بالی ووڈ اداکار شاہ رخ خان، اکشے کمار اور اجے دیوگن کو گزشتہ سال گٹکے کے اشتہار میں کام کرنے کے بعد شدید تنقید کا سامنا کرنا پڑا تھا۔
بھارتی میڈیا کی رپورٹ کے مطابق شدید تنقید کے بعد اکشے کمار نے اپنے مداحوں سے معذرت کرلی تھی اور دوبارہ ایسے کسی بھی اشتہار میں کام نہ کرنے کا فیصلہ کیا تھا۔
رپورٹ کے مطابق ان تینوں اداکاروں کے خلاف ایک ایڈووکیٹ نے الہٰ آباد کورٹ میں ایک درخواست دائر کی تھی جس میں یہ مؤقف اختیار کیا گیا تھا کہ ان مشہور اداکاروں کا گٹکے کے اشتہار میں کام کرنا درست نہیں ہے، یہ لوگ ایسا کر کے غلط چیز کو پروموٹ کر رہے ہیں۔
رپورٹ میں بتایا گیا ہے کہ جب ایڈووکیٹ کو اپنی دائر کردہ درخواست کا کوئی جواب نہیں ملا تو تنگ آکر ایڈووکیٹ نے حال ہی میں ایک بار پھر عدالت کا رخ کیا جس کے بعد عدالت نے تینوں اداکاروں کو نوٹس جاری کردیے ہیں۔
بھارتی میڈیا کی رپورٹ کے مطابق اس کیس کی سماعت کے دوران حکومتی وکیل نے عدالت کو آگاہ کیا کہ یہ معاملہ سپریم کورٹ میں بھی زیرِ سماعت ہے اور ان تمام اداکاروں کو پہلے ہی گٹکے کے اشتہار میں کام کرنے سے متعلق وجہ بتاؤ نوٹس جاری ہوچُکے ہیں اس لیے اس عدالت سے درخواست خارج کردیں۔
رپورٹ میں یہ بھی بتایا گیا ہے کہ اس کیس کی اگلی سماعت 9 مئی 2024ء کو مقرر ہے۔
