کینیا میں صومالیہ کی سرحد کے قریبی علاقے میں بس پر دہشت گرد حملے کے نتیجے میں پولیس اہلکاروں سمیت 10 افراد ہلاک ہوگئے۔
برطانوی خبررساں ادارے ’ رائٹرز ‘ کی رپورٹ کے مطابق مدینہ بس کمپنی سے وابستہ بس پر اس وقت حملہ کیا جب وہ کوٹولو کے راستے سے گزر رہی تھی، حملے کا شکار ہونے والی بس وجیر اور مندیرہ کےعلاقوں کے درمیان چلتی ہے۔
کینیا کے عہدیدار نے ایک بیان میں کہا کہ ’بہیمانہ طور پر قتل کیے گئے افراد میں پولیس اہلکار بھی شامل ہیں‘۔
پولیس نے کہا کہ حملے میں 10 افراد قتل ہوئے اور حملہ آوروں نے بس کو روکنے کے بعد صومالیہ سے تعلق نہ رکھنے والے افراد کو خاص طور پر نشانہ بنایا تھا،بس کو جس علاقے میں نشانہ بنایا گیا وہاں زیادہ صومالی نژاد کینیا کے شہری مقیم ہیں۔
مزید پڑھیں: کینیا: الشباب کا ہوٹل پر دہشت گرد حملہ، 5 افراد ہلاک
پولیس کے ترجمان چارلس اوینو نے ایک بیان میں کہا کہ ’ حملہ آوروں نے مقامی صومالیوں کو غیر مقامی افراد سے الگ کیا اور اس دوران 10 غیر مقامی افراد کو گولی ماردی‘۔
انہوں نے کہا کہ سیکیورٹی فورسز حملہ آوروں کی گرفتاری کی کوشش کررہی ہے جبکہ بس کے ڈرائیور اور کنڈیکٹر تحویل میں ہیں اور تحقیقات میں مدد کررہے ہیں۔
دوسری جانب شدت پسند تنظیم الشباب نے حملہ کرنے کا دعوی کیا ہے اور کہا کہ حملے میں خفیہ سیکیورٹی ایجنٹس اور سرکاری ملازمین سمیت 10 افراد ہلاک ہوئے۔
یہ بھی پڑھیں: کینیا کے وزیر خزانہ بدعنوانی کے الزام میں گرفتار
علاوہ ازیں فرانسیسی خبررساں ادارے ’ اے ایف پی‘ کی رپورٹ کے مطابق صدارتی ترجمان نے بتایا کہ کینیا کے صدر اوہورو کینیاتا کو وجیر کاؤنٹی میں بس حملے میں لوگوں کے بہمیانہ قتل سے متعلق بریف کیا گیا ہے ۔
سینئر پولیس ذرائع نے اے ایف پی کو بتایا کہ ’ بس حملے میں ہم نے 7 پولیس افسران کو کھودیا ‘۔
ذرائع نے بتایا کہ ’ بس حملے میں ہلاک ہونے والے افراد کی تعداد 10 ہے، جن میں سے ایک کی شناخت مقامی ڈاکٹر کے طور پر ہوئی‘۔
خیال رہے کہ رواں برس کے آغاز میں کینیا کے دارالحکومت نیروبی میں ایک پرتعیش ہوٹل اور آفس کمپلیکس پر الشباب کے حملے میں کم از کم پانچ افراد ہلاک اور متعدد زخمی ہو گئے تھے۔
دہشت گرد تننظیم الشباب اس سے قبل بھی کینیا میں بڑے حملے کر چکی ہے اور 2013 میں شاپنگ مال پر کیے گئے حملے میں کم ازکم 67افراد ہلاک ہو گئے تھے۔
اپریل 2015 میں الشباب نے مشرقی کینیا کے شہر گریسا میں یونیورسٹی پر حملہ کیا تھا جس کے نتیجے میں 148 افراد جان کی بازی ہار گئے تھے۔
