ڈیلس میں صحافیوں کی فلاح و بہبود کے لیے “ڈیلس پریس کلب” کے قیام کا فیصلہ
رپورٹ: راجہ زاید اختر خانزادہ
ڈیلس: ریاست ٹیکساس کے شہر ڈیلاس میں مقیم صحافیوں کا ایک غیر رسمی اجلاس مقامی ریسٹورنٹ میں منعقد ہوا، جس میں فیصلہ کیا گیا کہ شہر کے تمام صحافیوں کو متحد کر کے ان کی فلاح و بہبود کے لیے ایک منظم پلیٹ فارم تشکیل دیا جائے۔ اجلاس میں وائس آف ساؤتھ ایشیا کے چیف ایگزیکٹو زاہد رانا، جاگو ٹائمز کے ایڈیٹر انچیف راجہ زاہد اختر خانزادہ، منیجنگ ایڈیٹر فیاض حسن، نائب صدر امیر علی مکھانی، سوچ ٹی وی کے روح رواں سلمان عابدی ، منہاج بشیر اور دیگر نمایاں صحافیوں نے شرکت کی۔
اس موقع پر شرکاء کا کہنا تھا کہ ڈیلس میں سرگرم صحافی انفرادی سطح پر کمیونٹی کی خدمت میں مصروف ہیں، لیکن ایک مؤثر پلیٹ فارم کی عدم موجودگی کے باعث کمیونٹی اور میڈیا کے درمیان مضبوط رابطے کا فقدان ہے۔ اگرچہ کئی افراد سوشل میڈیا اور مختلف مقامی و پاکستانی میڈیا ہاؤسز کے ذریعے معلومات فراہم کر رہے ہیں، تاہم ایک ایسا فورم ضروری ہے جو صحافیوں کی فلاح و بہبود اور ان کے باہمی روابط کو مستحکم کرے۔ اجلاس میں اتفاق کیا گیا کہ ڈیلاس میں صحافیوں کے لیے ایک مؤثر اور منظم پلیٹ فارم قائم کیا جائے، جسے “ڈیلاس پریس کلب” کا نام دیا جائے۔ اس مقصد کے لیے دو ایکشن کمیٹیاں تشکیل دی گئیں، جو کلب کے قیام کے لیے تمام انتظامی اور قانونی تقاضے پورے کریں گی اور اس بات کو یقینی بنائیں گی کہ جلد از جلد “ڈیلاس پریس کلب” کا باقاعدہ قیام عمل میں لایا جائے۔ اجلاس میں یہ طے پایا کہ دونوں کمیٹیاں ایک ماہ بعد ہونے والے آئندہ اجلاس میں پیش رفت سے متعلق تفصیلات فراہم کریں گی۔ اجلاس میں اس بات پر بھی اتفاق کیا گیا کہ “ڈیلس پریس کلب” کی رکنیت ان تمام صحافیوں کو دی جائے گی جو کسی بھی قسم کے میڈیا سے وابستہ ہیں یا انفرادی طور پر سوشل میڈیا کے ذریعے کمیونٹی کی خدمت انجام دے رہے ہیں۔ یہ اقدام ڈیلس کے صحافیوں کے لیے ایک نئے دور کا آغاز ثابت ہوگا، جہاں نہ صرف ان کی فلاح و بہبود کو یقینی بنایا جائے گا بلکہ میڈیا اور کمیونٹی کے درمیان تعلق کو بھی مزید مضبوط کیا جائے گا۔
