ڈراما سیریل’’میرے پاس تم ہو‘‘ نے سینما گھروں میں بھی دھاک بٹھادی

کراچی: 

اداکار ہمایوں سعید، عدنان صدیقی اورعائزہ خان کے ڈرامے ’’میرے پاس تم ہو‘‘نے مقبولیت کے تمام ریکارڈز توڑ دئیے ہیں۔ یہاں تک کہ ہر ہفتے ڈرامے کی نئی قسط نشر ہونے پریہ ڈراما ٹوئٹر پر ٹاپ ٹرینڈ پر ہوتا ہے جب کہ سوشل میڈیا پر اس کی مقبولیت کا موازنہ پی ٹی وی کے دور کے ڈراموں سے کیا جارہا ہے۔

اس خبرکوبھی پڑھیں: امریکی طالبات کی ’’میرے پاس تم ہو‘‘ کا گانا گاتے ہوئے ویڈیووائرل

ڈراما سیریل ’’میرے پاس تم ہو‘‘کی پاکستان کے علاوہ بیرون ممالک مقبولیت کو دیکھ کر اس کی آخری قسط کو  امریکی سینما گھروں میں بھی دکھانے کی تیاریاں کی جارہی ہیں۔ ڈرامے کے مرکزی اداکار اور پروڈیوسر ہمایوں سعید نے ایک مقامی ویب سائٹ کے ساتھ بات کرتے ہوئے کہا ہے کہ ہم بہت سے امریکی ایگزیبیٹرز سے رابطے میں ہیں جو ڈرامے کی آخری قسط کو امریکی سینما گھروں میں دکھانے کے خواہشمند ہیں۔

اس خبرکوبھی پڑھیں: ’’میرے پاس تم ہو‘‘کا آخری سین لکھتے ہوئے رورہا تھا

ہمایوں سعید نے کہا  کہ امریکی سینماؤں میں کوئی بھی مواد دکھانے کے لیے ان کی سنسر پالیسی کے مطابق  تقریباً ایک ہفتے کا وقت درکار ہوتا ہے۔ ہماری ٹیم اس پر کام کررہی ہے اور ہم جلد اس کا حل بھی ڈھونڈ لیں گے۔

واضح رہے کہ  ڈراما سیریل ’’میرے پاس تم ہو‘‘کی آخری قسط 25 تاریخ کو دکھائی جائے گی اور آخری قسط کا دورانیہ ایک قسط کے مقابلے میں دوگنا ہوگا۔