کراچی:
کراچی کے نیشنل اسٹیڈیم میں کھیلے جارہے پاکستان سپر لیگ کے پانچویں ایڈیشن کے دوسرے میچ کا ٹاس پشاور زلمی کے کپتان ڈیرین سیمی نے جیت کر پہلے کراچی کنگز کو بیٹنگ کی دعوت دی۔
کراچی کنگز کی جانب سے شرجیل خان اور بابراعظم نے اننگز کا جارحانہ آغاز کیا تاہم شرجیل 11 گیندوں پر 19 رنز بنانے کے بعد پویلین واپس لوٹ گئے جس کے بعد کیمرون ڈیلپورٹ 20 رنز بناکر آؤٹ ہوئے۔
قومی ٹیم کے کپتان اور کراچی کنگز کے اوپننگ بلے باز بابراعظم نے شاندار بیٹنگ کا مظاہرہ کرتے ہوئے نصف سنچری اسکور کی، وہ 56 گیندوں پر 78 رنز کی اننگز کھیل کر آؤٹ ہوئے جب کہ کراچی کنگز کے کپتان عماد وسیم نے بھی نصف سنچری اسکور کی، وہ 30 گیندوں پر 50 رنز کی اننگز کھیلنے میں کامیاب رہے۔
افتخار احمد نے آخری اوور میں 3 گیندوں پر 16 رنز کی جارحانہ اننگز کھیلی۔ پشاور زلمی کی جانب سے حسن علی نے 2 اور محمد محسن نے ایک وکٹ حاصل کی۔
پشاور زلمی کی قیادت ڈیرین سیمی کررہے ہیں اور دیگر کھلاڑیوں میں کامران اکمل، ٹام بینٹن، لیام لیونگ اسٹون، حیدر علی، محمد محسن، شعیب ملک، لیام ڈاسن، وہاب ریاض، حسن علی اور راحت علی شامل ہیں۔
دوسری جانب عماد وسیم کی قیادت میں کراچی کنگز کو بابراعظم، شرجیل خان، چاڈوک والٹن، افتخار احمد، کیمرون ڈیلپورٹ، محمد رضوان، عماد وسیم، عمید آصف، محمد عامر، کرس جورڈن اور ارشد اقبال کی خدمات حاصل ہیں۔
