دنیا بھر میں پھیلی عالمی وبا کورونا وائرس ہر گزرتے دن کے ساتھ پاکستان میں مزید زور پکڑ رہی ہے اور اب تک پاکستان میں مصدقہ کیسز کی مجموعی تعداد 52 ہزار 162 جبکہ اموات ایک ہزار 87 ہوگئی ہیں۔
سرکاری سطح پر کورونا وائرس کے فراہم کردہ اعداد و شمار کے مطابق آج (23 مئی کو) ابھی تک ملک میں مزید 149 افراد میں وائرس کی تصدیق ہوئی ہے جبکہ وائرس سے صحتیاب ہونے والوں کی تعداد بھی بڑھی ہے۔
خیال رہے کہ ملک میں کورونا وائرس کا پہلا کیس 26 فروری، 2020 کو کراچی میں سامنے آیا تھا جس کے ساتھ اس کا پھیلاؤ روکنے کے لیے مختلف پابندیاں عائد کی گئی تھیں اور بعدازاں لاک ڈاؤن بھی نافذ کیاگیا تھا۔
عالمی وبا کا پہلا کیس سامنے آنے کے بعد ابتدا میں وائرس کا پھیلاؤ سست رہا لیکن گزرتے وقت کے ساتھ اب 3 ماہ کا عرصہ گزرنے کے بعد اس میں تیزی کا رجحان دیکھنے میں آرہا ہے جبکہ یومیہ اوسط ایک ہزار یا اس سے زائد کیسز کی تصدیق ہورہی ہے۔
پاکستان میں 26 فروری کے پہلے کیس سے لے کر اپریل کے اواخر تک کورونا مریضوں کی تعداد ساڑھے 16 ہزار سے زائد تھی جبکہ اموات 385 تھیں۔
تاہم رواں ماہ مئی کے آغاز سے لے کر اب تک پاکستان میں32 ہزار سے زائد کیسز اور 700 کے قریب اموات ہوچکی ہیں جو تشویشناک صورتحال کی نشاندہی کرتی ہے۔
خیال رہے کہ گزشتہ روز (22 مئی کو) پاکستان میں کورونا وائرس کے 2 ہزار 516 کیسز سامنے آئے تھے اور 35 اموات ہوئی تھیں۔
اسلام آباد
ہر گزرتے دن کے ساتھ وفاقی دارالحکومت اسلام آباد میں کورونا وائرس کے کیسز میں تیزی سے اضافہ دیکھنے میں آرہا ہے۔
کورونا وائرس کے سرکاری اعداد و شمار فراہم کرنے والی ویب سائٹ کے مطابق آج اسلام آباد میں عالمی وبا کے مزید 131 کیسز کی تصدیق ہوئی ہے۔
مذکورہ کیسز کے اضافے کے بعد اسلام آباد میں عالمی وبا سے متاثرہ افراد کی تعداد ایک ہزار 326 سے بڑھ کر ایک ہزار 457 ہوگئی۔
گلگت بلتستان
گلگت بلتستان میں بھی دن بدن عالمی وبا کے کیسز میں اضافہ ہورہا ہے جہاں مزید 5 کیسز کی تصدیق ہوئی ہے۔
کورونا وائرس کے سرکاری اعداد و شمار فراہم کرنے والی ویب سائٹ کے مطابق نئے کیسز کے بعد گلگت بلتستان میں متاثرہ افراد کی تعداد 602 سے بڑھ 607 تک جا پہنچی ہے۔
آزاد کشمیر
آزاد کشمیر اب تک وائرس سے سب سے کم متاثر ہوا ہے لیکن وہاں بھی مریضوں کی تعداد بتدریج بڑھ رہی ہے۔
سرکاری اعداد و شمار کے مطابق آزاد کشمیر میں آج کورونا وائرس کے 13 کیسز سامنے آئے جس کے بعد وہاں متاثرہ افراد کی تعداد 171 ہوگئی ہے۔
صحتیاب افراد
تاہم جوں جوں ملک میں عالمی وبا کے مریضوں اور اموات کی تعداد بڑھ رہی ہے وہیں کورونا وائرس سے صحت یاب ہونے والے افراد کی تعداد میں تیزی سے ہونے والا اضافہ اُمید کی کرن ہے۔
گزشتہ 24 گھنٹوں میں ملک میں کورونا وائرس سے ایک ہزار 452 افراد صحتیاب ہوئے۔
جس کے ساتھ ہی پاکستان میں عالمی وبا کو شکست دینے والوں کی مجموعی تعداد 15 ہزار201 سے بڑھ کر 16 ہزار 653 ہوگئی۔
مجموعی صورتحال
علاوہ ازیں اگر ملک میں مجموعی صورتحال کا جائزہ لیں تو اب تک 52 ہزار 13 لوگ متاثر ہوئے جس میں سے 1087 انتقال کرگئے جبکہ 15 ہزار 201 صحتیاب ہوگئے تو اس طرح 35 ہزار 725 فعال کیسز موجود ہیں۔
سندھ میں کورونا وائرس کے کیسز کی تعداد 20 ہزار 883 ہے جبکہ پنجاب میں 18 ہزار 455 لوگ متاثر ہوئے ہیں۔
خیبرپختونخوا میں عالمی وبا سے 7 ہزار 391 جبکہ بلوچستان میں 3 ہزار 198 افراد وائرس کا شکار ہوئے ہیں۔
اسلام آباد میں یہ تعداد ایک ہزار 457 ہے جبکہ گلگت بلتستان میں 607 اور آزاد کشمیر میں 171 افراد عالمی وبا سے متاثر ہوچکے ہیں۔
کورونا وائرس سے ہونے والی اموات کی صورتحال کچھ یوں ہے۔
- خیبرپختونخوا: 381
- سندھ: 340
- پنجاب: 310
- بلوچستان: 39
- اسلام آباد: 12
- گلگت بلتستان: 04
- آزاد کشمیر: 01
پاکستان میں کورونا وائرس
خیال رہے کہ ملک میں کورونا وائرس کا پہلا کیس 26 فروری 2020 کو کراچی میں سامنے آیا تھا اور 25 مارچ تک کیسز کی تعداد ایک ہزار تک پہنچ چکی تھی۔
تاہم اس کے بعد مذکورہ وائرس نے پاکستان میں اپنے پنجے گاڑنا شروع کردیے اور اب تک 52 ہزار سے زائد افراد کورونا وائرس سے متاثر ہوچکے ہیں۔
پاکستان میں اموات
ملک میں کورونا وائرس سے پہلی موت 18 مارچ کو خیبرپختونخوا میں ہوئی تھی جس کے بعد 31 مارچ تک اموات کی مجموعی تعداد 26 ہوگئی تھی۔
تاہم یکم اپریل سے لے کر 30 اپریل تک مزید 359 اموات ریکارڈ کی گئیں، بعد ازاں مئی میں یہ تعداد ایک ہزار 87 تک پہنچ گئی ہے۔
