پاکستانی اداکارہ و ماڈل میرب علی نے اپنے پالتو کتے کے انتقال کے بعد سوشل میڈیا پوسٹ پر مداحوں سے دعا کی درخواست کی جس پر صارفین نے اداکارہ کو تنقید کا نشانہ بنا ڈالا جس کے بعد میرب نے اس رویے پر دکھ کا اظہار کیا۔
میرب نے انسٹاگرام پر اپنے کتے کے ہمراہ ایک پوسٹ شیئر کی جس میں انہوں نے افسوس کے ساتھ اعلان کیا کہ ’ٹوکو‘ نامی ان کے پالتو کتے کا اچانک انتقال ہوگیا ہے۔
اداکارہ نے ایک روز قبل شیئر کردہ پوسٹ میں لکھا ’بہت دکھ کے ساتھ اعلان کررہی ہوں کہ آج صبح میری فیملی کا سب سے قریبی ساتھی ٹوکو کا اچانک انتقال کر گیا، وہ بیمار تھا لیکن ہمیں یقین تھا وہ ٹھیک ہو جائے گا’۔
میرب نے مزید لکھا تھا ‘برائے مہربانی ہمارے ٹوکو کے لیے دعا کریں، آج ہماری فیملی کا ایک فرد ہم سے جُدا ہو گیا’۔
اس پوسٹ کے بعد سوشل میڈیا صارفین نے میرب کو تنقید کا نشانہ بنا ڈالا اور ٹرولنگ کرنے لگے، صارفین نے اس پوسٹ پر انتہائی ذاتی نوعیت کے تبصرے کیے جس پر میرب نے دلبرداشتہ ہوکر انسٹاگرام پر اسٹوری پوسٹ کی اور تمام ٹرولرز کو آڑے ہاتھوں لیا۔
انہوں نےانسٹاگرام اسٹوری پر ردعمل دیا کہ ’لوگوں سے اپنے پالتو کتے کے لیے دعا مانگنے کے لیے معافی چاہتی ہوں جسے ہم اپنی فیملی سمجھتے تھے‘۔
ماڈل و اداکارہ نے لکھا کہ ’مجھے اندازہ نہیں تھا کہ لوگ کتنے بے حس ہو سکتے ہیں اور اب بھی دوسروں پر یہ حکم دیتے رہیں گے کہ ایسے وقت میں کیا اور کس طرح کے ردعمل کا اظہار کرنا چاہیے، یہ میرے اور میری فیملی کے لیے مشکل وقت تھا چاہے یہ آپ لوگوں کے لیے ہو یا نہ ہو‘۔
میرب علی نے مزید لکھا کہ ’میرے گھر جانوروں کے ساتھ فیملی جیسا سلوک کیا جاتا ہے، یہ دیکھ کر افسوس ہوا کہ آپ کے والدین نے آپ کی اس طرح پرورش کی ہے، ہمیشہ رحم دلی اور محبت کا مظاہرہ کرنا چاہیے، اگر آپ میری بات سے متفق نہیں تھے تو آپ کے پاس آپشن تھا کہ میری پوسٹ کو نظر انداز کر دیتے’۔
