وفاقی ریونیو بورڈ (ایف بی آر) نے ملک کے ٹیکس نظام کو جدید بنانے کے لیے ایک نیا ادائیگی کا سسٹم ’’ای پیمنٹ 2.0‘‘ متعارف کرایا ہے، جو ایف بی آر کے اس عزم کی عکاسی کرتا ہے کہ ٹیکس انتظامیہ کو بہتر بناتے ہوئے جدید ڈیجیٹل حل کے ذریعے محصولات میں اضافہ کیا جائے۔
ڈان اخبار کی رپورٹ کے مطابق، یہ نیا سسٹم آئی آر ایس 2.0 پورٹل پر دستیاب ہے اور ملک بھر کے ٹیکس دہندگان کے لیے ادائیگی کے عمل کو آسان بنانے کے لیے ڈیزائن کیا گیا ہے۔
ایف بی آر کی ڈائریکٹر جنرل (آئی ٹی اور ڈی ٹی) عائشہ فاروق نے اسلام آباد میں پی آر اے ایل ہیڈکوارٹرز میں ای پیمنٹ سسٹم کا افتتاح کیا۔
’’ای پیمنٹ 2.0‘‘ سسٹم ٹیکس دہندگان کو انٹرنیٹ بینکنگ، اے ٹی ایم اور موبائل بینکنگ کے ذریعے بینک اکاؤنٹس سے براہ راست، محفوظ اور صارف دوست آن لائن ادائیگیاں کرنے کی سہولت فراہم کرتا ہے، جس سے بینک جانے کی ضرورت ختم ہو جاتی ہے۔
یہ نیا نظام آمدنی، سیلز ٹیکس، فیڈرل ایکسائز ڈیوٹی اور ودہولڈنگ ٹیکس سمیت مختلف ٹیکسوں کی ادائیگی میں مدد فراہم کرتا ہے، جس سے ریونیو مینجمنٹ میں ایک اہم پیشرفت ہوئی ہے۔ پہلے، ٹیکس دہندگان کو آئی آر ایس 2.0 سے باہر ایک علیحدہ ای پیمنٹ سسٹم استعمال کرنا پڑتا تھا، جس کے لیے انہیں مختلف پورٹلز کے درمیان سوئچ کرنا پڑتا تھا۔ اب، ای پیمنٹ 2.0 کے ذریعے ایف بی آر نے ایک متحد اور بہتر یوزر فرینڈلی انٹرفیس فراہم کیا ہے، جو سیدھا آئی آر ایس 2.0 میں دستیاب ہے۔
یہ سسٹم دونوں رجسٹرڈ اور غیر رجسٹرڈ ٹیکس دہندگان کے لیے فوری اور آسان ادائیگی کی سہولت فراہم کرتا ہے، جو ایک منفرد پیمنٹ سلپ آئی ڈی (پی ایس آئی ڈی) تیار کرکے دستیاب ہوتی ہے۔ ادائیگی مکمل ہونے پر تصدیق شدہ کمپیوٹرائزڈ پیمنٹ رسید (سی پی آر) ای میل اور ایس ایم ایس کے ذریعے جاری کی جاتی ہے، جو بعد میں آئرس 2.0 سسٹم میں باضابطہ تصدیق اور آسان رسائی کے لیے محفوظ کی جاتی ہے۔
مزید تفصیلات کے مطابق، یہ سسٹم ایک محفوظ، درست اور ملٹی اسٹیپ ورک فلو کے ذریعے ٹیکس دہندگان کو پی ایس آئی ڈی بنانے، اے ڈی سی چینلز کے ذریعے ادائیگی مکمل کرنے اور فوری کمپیوٹرائزڈ رسید حاصل کرنے کی سہولت فراہم کرتا ہے، جو آئرس میں مستقبل کی تعمیل کی ضروریات کے لیے بھی قابل رسائی ہے۔
ایف بی آر نے اس سسٹم میں شفافیت اور جوابدہی بڑھانے کے لیے ایک جامع خصوصیت بھی شامل کی ہے، جس سے ٹیکس دہندگان آسانی سے اپنی ادائیگی کے ریکارڈز بازیافت اور تصدیق کر سکتے ہیں۔
آٹومیشن اور انضمام کی اس سطح کے ذریعے غلطیوں اور تاخیر کو کم کیا گیا ہے، جس سے ٹیکس کی ادائیگی کا تجربہ بہتر ہوا ہے اور ایف بی آر کے وژن کے تحت کاروبار کے لیے موافق اور تعمیلی ٹیکس ماحول کو فروغ دیا گیا ہے۔
’’ای پیمنٹ 2.0‘‘ کی متعارف کرانے کے ساتھ، ایف بی آر نے ٹیکس کی ادائیگی کے عمل کو آسان اور یکجا کر دیا ہے، تاکہ ٹیکس دہندگان کو بلا رکاوٹ اور بہتر تجربہ فراہم کیا جا سکے۔ یہ سسٹم ایک ہی انٹرفیس پر تمام ضروری افعال پیش کرتا ہے، جس سے ٹیکس دہندگان کو کئی لاگ ان یا مختلف پلیٹ فارمز کے درمیان سوئچ کرنے کی ضرورت نہیں پڑتی۔
بیان میں مزید کہا گیا ہے کہ ٹیکس دہندگان اب ایک ہموار عمل سے فائدہ اٹھا سکتے ہیں جو تمام ٹیکس ادائیگی کی ضروریات کو ایک چھت کے نیچے فراہم کرتا ہے، اور تعمیل کے عمل کو پہلے سے کہیں زیادہ آسان اور قابل رسائی بناتا ہے۔
ایف بی آر نے ایک جدید اور مستحکم انٹرفیس کے ذریعے صارف کے تجربے کو ترجیح دیتے ہوئے اپنے عزم کا اعادہ کیا ہے کہ وہ ٹیکس دہندگان کی حمایت کرے گا اور پاکستان کو ایک زیادہ موثر اور ڈیجیٹل طور پر ترقی یافتہ ملک بنانے میں اپنا کردار ادا کرے گا۔
