ویڈیو: برطانوی رکن پارلیمنٹ کا اردو میں حلف

برطانوی پارلیمنٹیرین میں آج اپنی نوعیت کا انوکھا واقعہ پیش آیا جہاں رکن پارلیمنٹ افضل خان نے اردو میں برطانیہ اور ملکہ سے وفاداری کا حلف لیا۔

افضل خان نے اپنے ٹویٹر اکاؤنٹ پر بھی حلف اٹھاتے ہوئے ویڈیو جاری کی ہے، ویڈیو میں برطانوی رکن پارلیمنٹ اردو میں حلف اٹھارہے ہیں کہ ’’میں اللہ کو حاضر ناظر جان کر کہتا ہوں کہ خلوص نیت سے ملکہ ایلزبتھ اور ان کے ورثاء اور جانشین کا قانون کے مطابق حامی و وفادار رہوں گا، اس لئے اللہ تعالیٰ میری مدد فرما‘‘۔

حلف مکمل ہونے پر افضل خان کے ساتھ دیگر کئی ارکان نے بھی آمین کہا، جسے واضح طور پر سنا جاسکتا ہے۔

اپنے ٹویٹر پیغام میں مانچسٹر سے رکن پارلیمنٹ کا کہنا ہے کہ مجھے اس بات پر فخر ہے کہ میں ایسے شہر سے ہوں جہاں 200 سے زائد زبانیں بولی جاتی ہیں۔

انہوں نے کہا کہ اردو میں حلف اٹھانے کا مقصد اپنے والد کو خراج عقیدت پیش کرنا تھا جنہوں نے برطانوی انڈین آرمی میں خدمات انجام دی تھیں۔