وزیراعظم کی معاون خصوصی برائے اطلاعات و نشریات فردوس عاشق اعوان کا کہنا ہے عمران خان سندھ کے عوام کے لیے خوشخبری بن کر کراچی پہنچ رہے ہیں۔
فردوس عاشق اعوان نے وزیراعظم سندھ کے نوجوانوں میں کامیاب جوان پروگرام کے تحت چیک تقسیم کریں گے، یہ پروگرام سندھی نوجوانوں کے خوابوں کی تعبیر کی جانب اہم قدم ثابت ہو گا۔
انہوں نے کہا کہ نوجوان ہمارا قیمتی اثاثہ ہیں اور انہیں بااختیار بنانا وزیراعظم کا وژن ہے، وزیراعظم عمران خان ہی نوجوانوں کی امید ہیں۔
وزیراعظم کی معاون خصوصی نے کہا کہ آسان قرضوں کی فراہمی، مالی معاونت کاروبار اور بااختیار بنانے کی جانب اہم سنگ میل ثابت ہو گا۔
فردوس عاشق اعوان نے کہا کہ سندھ کے نوجوانوں کی ترقی وفاق پاکستان کو مضبوط بنانے کے مترادف ہے اور وزیراعظم سندھ کے عوام کے لیے خوشخبری بن کر کراچی آ رہے ہیں۔
سیاسی جماعتوں کو تنقید کا نشانہ بناتے ہوئے فردوس عاشق اعوان نے کہا کہ سیاسی طوفان کی خواہش رکھنے والوں کے ارمانوں پر اوس پڑ چکی ہے، سیاسی مخالفین کے لیے اطلاع ہے کہ حکومت اتحادیوں کی حمایت کے ساتھ مستحکم ہے۔
فردوس عاشق اعوان نے مزید کہا کہ جمہوری اختلاف کو جمہوری انداز میں سلجھا لیا گیا ہے، عوام کی خوشحالی و ترقی کے ایجنڈےکو پوری قوت سے آگے بڑھائیں گے۔
