قومی کرکٹ ٹیم کے بالنگ کوچ عمر گُل نے پاکستان کو بھارت میں شیڈول ورلڈکپ سے قبل اپنے اٹیکنگ فاسٹ بولرز کو روٹیشن پالیسی کے تحت کھلانے کا مشورہ دیا ہے۔
سابق فاسٹ بولر اور نیوزی لینڈ کے خلاف سیریز کیلئے بالنگ کوچ کے فرائض سرانجام دینے والے عمر گل کا کہنا تھا کہ آئی سی سی ورلڈکپ سے قبل پاکستان کو اپنے فاسٹ بالرز کو ‘روٹیشن پالیسی’ کے تحت کھلانے پر زور دیتے ہوئے کہا کہ ہم خوش قسمت ہیں کہ اچھے فاسٹ باؤلرز ہیں جو 140+ پر باؤلنگ کر سکتے ہیں، سینئر پیسرز کو آرام دینا بہت ضروری ہے تاکہ وہ عالمی ٹورنامنٹ میں پرفارم کرسکیں۔
انہوں نے کہا کہ مجھے یقین ہے کہ پی سی بی اور سلیکشن کمیٹی اس پر غور کر رہی ہے کیونکہ یہ وقت بہت اہم ہے، ہم اس وقت کسی پلئیر کی انجری کو برداشت نہیں کرسکتے، مجھے خوشی ہے کہ بورڈ نے مجھ پر اعتماد کیا۔
عمر گل کا کہنا تھا کہ ہمارے پاس بہت اچھے اور با صلاحیت تیز گیند باز ہیں، میں صرف ان کے ساتھ وقت گزارنے کی کوشش کرتا ہوں اور انہیں بتاتا ہوں کہ کریز پر نئے بلےباز سے کیسے نمٹا جائے۔
