بالی ووڈ فلم انڈسٹری کے مشہور و معروف اداکار نواز الدین صدیقی نے بتایا ہے کہ انہوں نے خواجہ سراؤں کیساتھ کام کر کے کیا سیکھا۔
اداکار نواز الدین صدیقی نے اپنی نئی فلم ’ہڈی‘ میں تقریباً 90 سے زائد خواجہ سراؤں کے ساتھ کام کیا ہے۔
حال ہی میں اپنے دیے گئے ایک انٹرویو میں اداکار نواز الدین صدیقی نے خواجہ سراؤں کے ساتھ کام کرنے اور فلم میں خواجہ سرا کا کردار ادا کرنے کے اپنے تجربے کے بارے میں کھُل کر بات کی۔
ان کا کہنا تھا کہ فلم ’ہڈی‘ میں حقیقی خواجہ سراؤں کے ساتھ کام کرنا ایک ناقابلِ یقین تجربہ رہا، اس کمیونٹی کے بارے میں مزید سمجھنے اور جاننے کا موقع ملنا ایک اعزاز ہے۔
انہوں نے کہا کہ سیٹ پر خواجہ سراؤں کی موجودگی اُنہیں بااختیار بنا رہی تھی۔
اداکار نے خواجہ سرا کا کردار ادا کرنے پر اپنی بیٹی کے ردِعمل کے بارے میں بات کرتے ہوئے کہا کہ ’میری بیٹی بہت پریشان ہوئی جب اس نے مجھے اسکرین پر ایک خاتون کے لباس میں دیکھا‘۔
ان کا کہنا تھا کہ اب جبکہ وہ یہ جان گئی ہے کہ میں ایسا صرف اپنے کردار کے لیے ایسا نظر آتا ہوں تو وہ ٹھیک ہوگئی۔
انہوں نے مزید کہا کہ فلم میں خواجہ سرا کا کردار ادا کرنے کے بعد ان کے دل میں خواتین اداکاراؤں کے لیےاحترام مزید بڑھ گیا ہے کیونکہ وہ روزانہ کی بنیاد پر اتنی محنت کرتی ہیں۔
