پاکستان شوبز انڈسٹری کی معروف اداکارہ منشا پاشا نے شوبز شخصیات کی شادیاں ناکام ہونے کی وجہ بتادی۔
اداکارہ کا کہنا ہے کہ شوبز شخصیات کی شادیوں کی ناکامی کی بڑی وجہ غیر ضروری دِکھاوا ہے۔
منشا پاشا نے حال ہی میں ایک یوٹیوب شو میں بطور مہمان شرکت کی، جہاں انہوں نے مختلف سماجی مسائل سمیت شوبز شخصیات کی شادیوں کے ناکام ہونے کے بارے میں بات کی۔
منشا پاشا کا کہنا ہے کہ ہم اداکار غیر مستحکم ہوتے ہیں اور ہمارا کام ہماری دماغی صحت کو بھی متاثر کرتا ہے کیونکہ ہم مسلسل کیمرے کے سامنے تاثرات اور جذبات سے کھیل رہے ہوتے ہیں۔
اُنہوں نے کہا کہ شائقین ڈرامے میں ادا کئے گئے کردار سے ہی ہمارے بارے میں اپنی رائے قائم کرلیتے ہیں، جیسے کہ اکثر جب کوئی اداکار اور اداکارہ کسی ڈرامے میں بطور جوڑی اسکرین پر نظر آتے ہیں تو لوگ ان کی جوڑی کو بے حد پسند کرنےلگتے ہیں۔
اُنہوں نے اداکاروں کی شادیاں ناکام ہونے کے بارے میں بات کرتے ہوئے کہا کہ جس کی وجہ سے وہ آن اسکرین جوڑی بھی یہ بات محسوس کرنے لگتی ہے کہ وہ ایک ساتھ اچھے لگتے ہیں اور انہیں پسند بھی کیا جارہا ہے تو وہ شادی کرلیتے ہیں جوکہ بعد میں مسائل کا سبب بن جاتی ہے۔
اُنہوں نے مزید کہا کہ اب ایسی صورتحال اس لیے بنتی ہے کیونکہ وہ دونوں اسکرین پر تو ایک ساتھ اچھے ضرور لگ رہے ہیں لیکن دونوں نے ایک دوسرے کو ذاتی طور پر سمجھا نہیں ہوتا۔
منشا پاشا نے کہا کہ ہم اداکاروں کے کام کی نوعیت ہی دکھاوا کرنا ہے اور یہی وجہ ہے کہ ہم جو بھی کر رہے ہوتے ہیں وہ سوشل میڈیا پر پوسٹ کررہے ہوتے ہیں جہاں لوگ ہماری زندگی کے معاملات پر تبصرے بھی کررہے ہوتے ہیں۔
اُنہوں نے کہا کہ اسی لیے اُنہیں ہماری شادی اور طلاق کے بارے میں جاننے کیلئے بھی تجسس ہوتا ہے۔
اُنہوں نے کہا کہ اداکاروں کو اپنی ذاتی زندگی سے جُڑے معاملات سوشل میڈیا پر نہیں بتانے چاہیئں، اپنی منگنی شادی وغیرہ کو سوشل میڈیا سے دور رکھنا چاہیئے کیونکہ ہماری شادی ہے، سوشل میڈیا پر دکھایا جانے والا رشتہ نہیں۔
اُنہوں نے مزید کہا کہ اداکاروں کی شادیاں ناکام ہونے کی اور بھی کئی وجوہات ہوسکتی ہیں مگر ان میں سے ایک بڑی وجہ یہ دِکھاوا ہی ہے۔
