فیملی کورٹ شرقی کی جانب سے فلم و ٹی وی اداکار فیروز خان کو سابقہ اہلیہ، علیزا سلطان کو بچوں کے اخراجات کی مد میں ماہانہ 80ہزار روپے ادا کرنے کا حکم دیا گیا ہے۔
کراچی کی مقامی عدالت میں فیروز خان اور سابقہ اہلیہ علیزا سلطان کی جانب سے دائر کردہ درخواستوں پر سماعت ہوئی۔
اس دوران دونوں فیریقین سماعت کے لیے عدالت میں پیش ہوئے۔
عدالت نے دورانِ سماعت اداکار فیروز خان کو پر ماہ کی 14 تاریخ سے قبل بیٹے سلطان کے لیے 50 اور بیٹی فاطمہ کے لیے ماہانہ 30 ہزار اخراجات کی مد میں ادا کرنے کا حکم دیا۔
سماعت کے دوران عدالت نے فیروز خان کے بیٹے سلطان کی حوالگی 5 روز کے لیے باپ کے حوالے کرنے کا بھی حکم جاری کیا۔
عدالت نے ریمارکس دیتے ہوئے کہا کہ سلطان 22 دسمبر سے پانچ روز کے لیے والد فیروز خان کے ساتھ رہیں گے، بطور والد فیروز خان کا حق ہے کہ وہ بچوں کے ساتھ وقت گزاریں، فیروز خان کی بیٹی کی عمر سات ماہ ہے وہ ماں کے بغیر نہیں رہ سکتی۔
اس دوران فیروز خان کے بچوں کی والدہ، علیزا سلطان نے عدالت کو بتایا کہ اس سے قبل بھی ان کا بیٹا سلطان اپنے والد کے ساتھ رات رہ چکا ہے۔
بعد ازاں عدالت نے فیروز خان کو ایک لاکھ روپے بطور ضمانت جمع کرانے کا حکم دیتے ہوئے کہا کہ جب تک سلطان فیروز خان کے پاس رہے گا فیروز خان کا پاسپورٹ اور شناختی کارڈ عدالتی ناظر کے پاس جمع رہے گا۔
یاد رہے کہ فیروز خان کی سابقہ اہلیہ علیزا سلطان نے بچوں کی کفالت کے لیے ماہانہ 2 لاکھ کی درخواست عدالت میں دائر رکھی تھی جبکہ فیروز خان کا کہنا تھا کہ وہ ماہانہ فی بچہ صرف 20 ہزار ہی ادا کر سکتے ہیں۔
