پاکستان شوبز انڈسٹری کی خوبصورت اور مشہور اداکارہ سونیا حسین نے کہا ہے کہ معروف اداکار فیروز خان اور محسن عباس حیدر پر لگے الزامات کی مکمل حقیقت کا علم نہیں۔
حال ہی میں اداکارہ سونیا حسین نے اپنے دیے گئے ایک انٹرویو میں فیروز خان اور محسن عباس حیدر پر لگائے گئے الزامات پر بات کرتے ہوئے کہا کہ انہیں مکمل طور پر دونوں کے معاملات کے اصل حقائق کا علم نہیں اور اسی وجہ سے وہ ان کے مسئلے پر بات نہیں کر سکتیں۔
ان کا کہنا تھا کہ میں نہیں جانتی کہ دونوں اداکاروں پر لگائے گئے الزامات کس قدر سچے ہیں؟ میں صرف کسی کی تشدد کی تصاویر دیکھ کر یہ فیصلہ نہیں کر سکتی کہ مجرم کون ہے اور کون متاثر ہے۔
انہوں نے کہا کہ وہ دونوں اداکاروں کے معاملے پر اس وقت ہی بہتر انداز میں بات کر سکتی ہیں جبکہ وہ دونوں فریقین سے بات کریں اور معاملات کی جانچ پڑتال کریں۔
سونیا حسین کے مطابق ماضی میں انہوں نے ایک بار فیروز خان سے ان کی ازدواجی زندگی سے متعلق پوچھا تھا لیکن اس وقت اداکار نے انہیں بتایا تھا کہ ان کے اور اہلیہ کے درمیان سب معاملات ٹھیک ہیں اور انہوں نے زیادہ تفصیل نہیں بتائی، اس لیے انہوں نے دوبارہ ان سے ذاتی زندگی سے متعلق کبھی نہیں پوچھا۔
ان کا کہنا تھا کہ ماضی میں جب انہوں نے محسن عباس حیدر کے ساتھ ایک گانے میں کام کیا تو ان کا گانا اداکار پر الزامات کی وجہ سے دو سال کی تاخیر سے ریلیز کیا گیا اور اس وقت محسن عباس حیدر کو تمام منصوبوں سے الگ کردیا گیا اور ایک ایسا وقت بھی آیا جب اداکار کے پاس خوراک کھانے کے لیے پیسے بھی نہیں تھے۔
پاکستان شوبز انڈسٹری کی خوبصورت اور مشہور اداکارہ سونیا حسین نے مزید کہا کہ جن افراد پر اس طرح کے الزامات لگتے ہیں، ان سے ہر طرح کے تعلق ختم کرنا، انہیں ہر چیز سے الگ کرنا مناسب نہیں، انہیں اس وقت مدد کی ضرورت ہوتی ہے، ایسے لوگوں کو اس وقت علاج کے لیے مدد دی جانی چاہیے۔
