پاکستان تحریک انصاف (پی ٹی آئی) رہنما اسد عمر نے کہا ہے کہ عمران خان کی قانونی طور پر گرفتاری کی کوئی گنجائش نہیں ہے، اگر غیرقانونی طور پر گرفتار کرنے کی کوشش کی گئی تو سیاسی اور قانونی طریقے سے بھرپور جواب دیا جائے۔
لاہور میں میڈیا سے گفتگو کرتے ہوئے تحریک انصاف کے رہنما اسد عمر نے کہا کہ پاکستان کی عدلیہ کے لیے یہ بہت بڑا لمحہ ہے جب آئین کی حرمت کو کھلم کھلا چیلنج کیا جا رہا ہے اور ایسے بیانات سامنے آرہے ہیں جن سے ماضی کے ڈکٹیٹروں کی گونج سنائی دیتی ہے۔
اسد عمر نے کہا کہ حقیقی آزادی اور آئین و قانون کی بالادستی کے لیے قوم اس وقت عمران خان کے ساتھ کھڑی ہے، لہٰذا انتخابات نہ کرانے کی سازش کو تحریک انصاف تو مسترد کرتی ہی ہے مگر قوم بھی اس کو مسترد کرتی ہے۔
انہوں نے کہا کہ ہمیں یقین ہے کہ پاکستان کی عدالتیں بھی ایسی سازشوں کو مسترد کریں گی۔
اسد عمر نے کہا کہ جس تاریخ ساز دور سے ملک گزر رہا ہے اس کی بہت بھاری قیمت پاکستان کے عوام کو ادا کرنی پڑ رہی ہے، اس حکومت کے اپنے جاری کردہ اعداد و شمار کے مطابق عوام پاکستان کی تاریخ کی بدترین مہنگائی سے گزر رہی ہے۔
انہوں نے کہا کہ حکومتی وزیر کی انا پرست پالیسی ہے کہ میں ڈالر کو دو سو سے نیچے کروں گا، مگر اس نے ملک میں ایسی تباہی مچائی کہ ہزاروں کاروبار بند ہوگئے، ذخائر خطرناک حد تک نیچے گر گئے جبکہ بیرون ملک کے لوگوں نے اعلان کرنا شروع کردیا کہ وہ پاکستان کے ساتھ کاروبار نہیں کریں گے اور ڈالر کو دو سو تک لانے کا نتیجہ یہ نکلا کہ آج ڈالر 250 تک فروخت ہو رہا ہے۔
اسد عمر نے کہا کہ اسٹیٹ بینک کی طرف سے ڈالر کی قیمت مارکیٹ کے مطابق کرنے کی اجازت کے بعد یہ صورتحال ہے کہ پاکستان کی تاریخ میں ایک دن کے اندر روپے کی قدر میں اتنی کمی کبھی نہیں آئی۔
انہوں نے کہا کہ اس تباہی نے براہ راست پاکستان کے عوام کی زندگی اجیرن بنادی ہے اور یہ تباہی اس وقت تک نہیں رکے گی جب تک پاکستان نئے انتخابات کی طرف نہیں جائے گا۔
اسد عمر نے کہا کہ اسمبلیاں تحلیل ہونے کے بعد آئینی مدہ شروع ہو چکا ہے اس لیے الیکشن کی تاریخ کا اعلان کیا جائے تاکہ پاکستان اس عذاب سے نکل سکے۔
ایک سوال کے جواب میں انہوں نے کہا کہ ہمیں بالکل ادراک تھا کہ اسمبلیاں تحلیل کرنے کے بعد انتقائی کارروائیاں کی جائیں گی اور اس میں کوئی تعجب کی بات نہیں کیونکہ ایک طرف ملک ہے اور دوسرے طرف مجھ سمیت عمران خان اور دیگر پارٹی رہنماؤں کی ذات پر تکلیف ہے، لہٰذا ہم اپنی ذات پر تکلیف برداش کرنے کو تیار ہیں لیکن ملک اور عوام پر تکلیف برداش نہیں کریں گے۔
عمران خان کی ممکنہ گرفتاری پر بات کرتے ہوئے اسد عمر نے کہا کہ قانونی طور پر گرفتاری کی کوئی گنجائش نہیں ہے، اگر غیرقانونی طور پر گرفتار کرنے کی کوشش کی گئی تو سیاسی اور قانونی طریقے سے بھرپور جواب دیا جائے گا۔
