معروف ڈرامہ ’رانجھا رانجھا کردی‘ میں ’بھولے‘ کے کردار سے شہرت پانے والے اداکارعمران اشرف نے ولاگنگ میں نام بناکراسے خیرباد کہنے والے ولاگرعرفان جونیجو کو یوٹیوب چھوڑنے کے بجائے مقابلہ کرنے کی نصیحت کی ہے۔
معروف ولاگرعرفان جونیجو کےاچانک اعلان کے بعد ایک جانب سوشل میڈیا صارفین نے افسوس کا اظہارکیا تو اس موقع پرمعروف اداکارعمران اشرف اعوان بھی چُپ نہ بیٹھے۔ انہوں نے بھی عرفان جونیجو کویوٹیوب چھوڑنے سے منع کرتے ہوئے کہا کہ میں سمجھ سکتا ہوں کہ انزائیٹی ایک خطرناک بیماری ہےلیکن اس کے خلاف لڑنے کی کوشش کروکیوں کہ اللہ بڑا مہربان ہے۔
اداکار عمران اشرف نے یہ بھی کہا کہ آپ اس مقام تک ایسے ہی نہیں پہنچے ہو، اس کامیابی کے پیچھے آپ کی محنت ہے، درحقیقت ہمارے پاس تو ٹیلی ویژن کی صورت میں پلیٹ فارم ہے لیکن آپ تو لوگوں کے لئے مشعل راہ ہو کیوں کہ آپ نے بغیر کسی ٹی وی چینل کے نام بنایا ہے۔
عمران اشرف نے نصیحت کرتے ہوئے کہا کہ میرے کہنے پر ایک بار اللہ پر یقین رکھتے ہوئے اس بیماری کے خلاف لڑکر دیکھو پھر دیکھنا کامیابی تمہاری ہوگی۔
خیال رہے کہ گزشتہ روزمقبول ترین ولاگرعرفان جونیجو نےایک ویڈیو جاری کی تھی جس میں انہوں نے یوٹیوب سے کنارہ کشی کرنے کا اعلان کرتے ہوئے کہا تھا کہ میں اب کسی بھی ایونٹ یا ایوارڈ کی تقریب میں بھی نہیں جاتا۔ حتیٰ کہ میں نے ٹوئٹر کو بھی چھوڑ دیا ہے اور کیمرہ استعمال کرنا بھی بہت کم کر دیا ہے۔
عرفان جونیجو نے وضاحت دیتے ہوئے مزیدکہا کہ ’میں نے ولاگز بنانا اس لیے شروع کیا تھا کیونکہ مجھے ولاگز دیکھنا بہت پسند تھا، مجھے لگتا تھا کہ ولاگز بنانے میں بہت مزہ آتا ہوگا۔
یوٹیوبر نے بتایا کہ ایک لڑکا جو کسی وقت میں اپنی زندگی میں مگن رہتا تھا اور دنیا کو اپنی نظر سے دیکھتا تھا لیکن اب وہی شخص اب دن بدن بد ظن ہوتا جارہا ہے اور یہ سب بھی ولاگ ہی کی وجہ سے ہورہا ہے۔
انہوں نے یہ بھی کہا کہ میں اب خود اعتمادی اور اضطراب کا شکار ہوں۔ ولاگنگ میری زندگی کی ترجیح نہیں رہی۔ اب میں ولاگ اپنی مرضی سے مخصوص وقت پر ہی بناؤں گا۔
