پاکستان کےعالمی شہرت یافتہ گلوکار علی ظفر اور دنیا کے امیر ترین بزنس مین ایلون مسک میں ٹوئٹر کو بہتر بنانے کے لیے تبادلہ خیال ہوا۔
ایلون مسک نے گزشتہ روز ٹوئٹر صارفین سے وائن ایپ کی بحالی کے حوالے سے رائے مانگی جس پر مشہور امریکی یوٹیوبر مسٹر بیسٹ نے اظہارِ خیال کرتے ہوئے کہا کہ اگر آپ ایسا ٹک ٹاک سے مقابلے کی نیت سے کرنا چاہتے ہیں تو یہ مضحکہ خیز ہے۔
جس پر ایلون مسک نے سوال کرتے ہوئے کہا کہ ہم وائن ایپ کو ٹِک ٹاک سے بہتر بنانے کے لیے کیا کر سکتے ہیں؟
جواب میں گلوکار علی ظفر نے اپنی رائے پیش کرتے ہوئے کہا کہ تخلیق کاروں کو ’لائکس‘ اور ’فالوور‘ کی جنگ سے نکال کر زیادہ سے زیادہ مراعات دی جائیں، انہیں اپنی الگ آن لائن ڈیجیٹل دنیا قائم کرنے کی آزادی دی جائے، جہاں وہ جو مرضی آئے تخلیق کریں، مختلف چیزوں کو سیکھیں اور نت نئی تخلیق کریں، اپنے ہم خیال لوگوں سے مل کر سیکھیں اور اس سے کمائیں۔
انہوں نے کہا کہ ٹوئٹر کے الگورتھمز کو بھی بہتر بنایا جائے تاکہ مختلف ممالک کے ہم خیال لوگ ایک جگہ جمع ہوسکیں اور ایک دوسرے سے اپنا مواد شیئر کرسکیں اور اسی مناسبت سے سرمایہ کار ان پر سرمایہ کاری کرسکیں۔
جس پر ایلون مسک نے لکھا کہ جاپان نصف سے زیادہ نوجوان صارفین کے پاس حیرت انگیز اور منفرد مواد ہے لیکن جاپان کے علاوہ کہیں اور ایسا کچھ کبھی نظر نہیں آیا۔
واضح رہے کہ مائیکرو بلاگنگ سائٹ ٹوئٹر کا نظام سنبھالنے کے بعد سے ایلون مسک اس میں کئی قسم کی تبدیلیاں کرنے کا ارادہ رکھتے ہیں جو جلد دیکھنے کو ملیں گی۔
