الیکشن کمیشن آف پاکستان (ای سی پی) نے شیخوپورہ میں ضمنی انتخاب کے دوران ضابطہ اخلاق کی خلاف ورزی پر وفاقی وزیر رانا تنویر حسین کو 30 اگست کو طلب کر لیا۔
الیکشن کمیشن نے کہا کہ وفاقی وزیر رانا تنویر حسین کے حلقہ پی پی 139 (شیخوپورہ-5)کے دورے کے بارے میں تصویری شواہد کے ساتھ شکایات موصول ہوئی ہیں جہاں ضمنی انتخاب ہو رہا ہے۔
رانا تنویر حسین کو الیکشن کمیشن کے نوٹس میں کہا گیا کہ ’آپ کو اپنا تحریری بیان ذاتی طور پر یا مجاز نمائندے کے ذریعے 30 اگست کو ڈسٹرکٹ مانیٹرنگ افسر کے سامنے جمع کرانا ہوگا تاکہ یہ وضاحت کی جا سکے کہ قانون کے تحت آپ کا کیس کیوں نہ چلایا جائے‘۔
الیکشن کمیشن کے ضابطہ اخلاق کے مطابق صدر، وزیراعظم، چیئرمین/ڈپٹی چیئرمین سینیٹ، کسی اسمبلی کے اسپیکر/ڈپٹی اسپیکر، وفاقی وزرا، وزرائے مملکت، گورنرز، وزرائے اعلیٰ، صوبائی وزرا اور مشیروں سمیت پبلک آفس ہولڈرز، وزیراعظم اور وزیراعلیٰ، میئر/چیئرمین/ناظم، اور ان کے نائبین ضمنی انتخابات کی مہم میں حصہ نہیں لے سکتے۔
اس سے قبل الیکشن کمیشن نے این اے 108 (فیصل آباد) سے مسلم لیگ (ن) کے امیدوار عابد شیر علی کو ضابطہ اخلاق کی خلاف ورزی پر نوٹس جاری کیا۔
ڈسٹرکٹ مانیٹرنگ افسر کے جاری کردہ نوٹس میں کہا گیا کہ عابد شیر علی وفاقی حکومت کی جانب سے بجلی کے بلوں میں فیول پرائس ایڈجسٹمنٹ (ایف پی اے) کے خاتمے کے بارے میں حلقے کی مساجد میں اعلانات کر رہے ہیں۔
