صوفی اوپیرا اسٹار سائرہ پیٹر نے ترکی کے شہر قونیہ میں مولانا رومی کے مزار کے سامنے شوٹ کی گئی فیوژن قوالی ریلیز کر دی۔
انہوں نے مولانا جلال الدین رومی کے صوفیانہ کلام کو خود ہی کمپوز کیا اور قوالی کے اس فیوژن کو مولانا رومی کے مزار مبارک کے سامنے ریکارڈ کیا۔
پاکستانی نژاد برطانوی گلوکارہ سائرہ پیٹر کا کہنا ہے کہ پوری دنیا میں صوفی میوزک مقبول ہو رہا ہے۔
سائرہ نے بتایا کہ جلال الدین رومی ابتدائی علوم کی منازل طے کرنے کے بعد 19 سال کی عمر میں اپنے والد محترم کے ساتھ قونیہ چلے آئے۔
ان کا کہنا تھا کہ مولانا رومی کا کلام ایک طرف تو حکمت اور اعلیٰ خیالات کا گنجینہ ہے تو دوسری طرف شاعری کے محاسن سے پُر ہے۔
گلوکارہ نے کہا کہ اُن کے کلام میں سادگی بھی ہے، سوز و گداز بھی ہے، عشق کی وارفتگی بھی اور وحدت کا اظہار بھی ہے۔
انکا کہنا تھا کہ اگرچہ ان کی شاعری کا خاص موضوع روحانیت اور عشق حقیقی یا عشق الہٰی تھا لیکن اس کے ساتھ ساتھ انہوں نے مذہبی رواداری، اعتقاد، اخلاق، سخاوت، اچھائی اور تربیت کے موضوعات پر بھی بہت زور دیا۔
سائرہ پیٹر نے کہا کہ اس کے علاوہ انہوں نے محبت کی اہمیت اور حقیقت کے بارے میں بھی درس دیا، ان کی تعلیمات بتاتی ہیں کہ ظاہری و باطنی تمام علم انسان کے اپنے باطن میں موجود ہے۔
پاکستانی گلوکارہ کا کہنا تھا کہ یہی وجہ ہے کہ صوفیاء انسان کو اپنے باطن کے کھوجنے پر زور دیتے ہیں، مولانا رومی کے اشعار انسان کو اپنی اصل، یعنی اپنے باطن کی جانب متوجہ کرتے ہیں۔
سائرہ پیٹر نے کہا کہ ان سب باتوں کو سامنے رکھتے ہوئے قوالی کا فیوژن بنایا، اس کی ویڈیو کی شوٹنگ کیلئے قونیہ کے محکمہ ثقافت نے تعاون کیا۔
انہوں نے مزید کہا کہ میں جلد پاکستان آرہی ہوں۔
