صنفی امتیاز پرمہوش حیات کا ٹوئٹرفالوور کوکرارا جواب

تمغہ امتیاز وصول کرنے والی اداکارہ مہوش حیات ملکی وغیرملکی سیاسی معاملات پرگہری نظررکھنے کے علاوہ حاضر جوابی میں بھی کسی سے کم نہیں۔

عراق میں امریکی فضائی حملے میں جاں بحق ہونے والے ایرانی فوجی کمانڈر قاسم سلیمانی کے معاملے پراداکارہ نے امریکی اقدام کی مذمت کرتے ہوئے ٹویٹ کی، تو ایک صارف کی جانب سے صنفی امتیاز پرمبنی جواب دیا گیا۔

مہوش حیات نے اپنی ٹویٹ میں لکھا تھا ’’ یقین نہیں آتا کہ سال 2020 میں قدم رکھے ہوئے ہمیں صرف 72 گھنٹے (3 دن ) ہوئے ہیں اور دنیا جنگ کے دہانے پرکھڑی ہے۔ میرے خیال سے یہ تب ہوتا ہے جب ’’ آزاد دنیا کا لیڈر ‘‘ بین القوامی قوانین کا خیال کیے بغیر یکطرفہ فیصلے کرے۔ یہ صرف ایران اور امریکہ سے متعلق نہیں ، خدا ہماری حفاظت کرے‘‘۔

اس ٹویٹ کے جواب میں ایک صارف نے تبصرہ کیا ’’ جب خواتین بین الاقوامی تعلقات کو سمجھنا شروع کردیں‘‘۔

اداکارہ نے خواتین کے حوالے سے ایسی سوچ رکھنے والے صارف کو منہ توڑ جواب دیتے ہوئے سابق وزیراعظم بینظیر بھٹو سمیت بہترین صلاحیتوں کی حامل اور بین القوامی پہچان رکھنے والی چند خواتین کا نام بطور مثال دیتے ہوئے مشورہ دیا کہ اپنی محدود دنیا سے باہرنکلیں ۔

مہوش حیات اس سے قبل بھی کشمیر سمیت دیگر اہم معاملات سے متعلق سوشل میڈیا پر اپنی آواز بلند کرنے میں پیش پیش رہی ہیں۔