2 دن قبل ہی شوبز انڈسٹری کی معروف جوڑی اقرا عزیز اور یاسر حسین کی شادی کی خبروں نے شائقین کو خوش کیا تھا۔
تاہم اب خبریں ہیں کہ شوبز انڈسٹری کی معروف جوڑی شہروز سبزواری اور سائرہ شہزور نے علیحدگی کا فیصلہ کرلیا۔
جی ہاں، خبریں ہیں کہ شہروز سبزواری اور سائرہ شہروز نے طلاق کا فیصلہ کرلیا تاہم واضح طور پر دونوں اداکاروں نے اس حوالے سے کوئی بیان نہیں دیا۔
شوبز ویب سائٹ ’رویو اٹ پی کے‘ نے اپنی رپورٹ میں دعویٰ کیا کہ شہروز سبزواری نے اس بات کی تصدیق کی ہے کہ وہ اب اپنی اہلیہ کے ساتھ نہیں رہتے اور انہوں نے علیحدگی کا فیصلہ کرلیا۔
دوسری جانب ’مینگو باز‘ نے بھی اپنی رپورٹ میں چہ مگوئیوں اور ذرائع سے خبر دی کہ دونوں کے درمیان علیحدگی کی خبریں ہیں۔
ویب سائٹ نے اپنی خبر میں سوشل میڈیا پر چلنے والی چہ مگوئیوں اور خبروں کو بنیاد بناتے ہوئے کہا کہ اگرچہ دونوں اداکاروں نے اپنی علیحدگی سے متعلق کوئی بیان نہیں دیا، تاہم خبریں ہیں کہ دونوں نے علیحدگی اختیار کرلی۔
شہروز سبزواری اور سائرہ شہروز کے درمیان علیحدگی کی خبریں سوشل میڈیا پر کئی ہفتوں سے جاری تھیں اور اب ان خبروں میں شدت آنے کے ساتھ یہ بھی دعویٰ کیا جا رہا ہے کہ دونوں نے علیحدگی کا فیصلہ کرلیا۔
سامنے آنے والی رپورٹس میں شہروز سبزواری اور سائرہ شہروز کی جانب سے کئی ہفتوں سے ایک دوسرے کے ساتھ کوئی تصویر سوشل میڈیا پر شیئر نہ کیے جانے کو سبب قرار دیتے ہوئے دعوے کیے جا رہے ہیں کہ دونوں کے درمیان اختلافات تھے اور اب انہوں نے علیحدگی اختیار کرلی۔
دونوں کی علیحدگی کی خبر سامنے آتے ہی ’سائرہ‘ کا ٹرینڈ بھی ٹوئٹر پر ٹاپ ٹرینڈز میں آگیا اور کئی لوگوں نے دونوں کی علیحدگی پر حیرانگی کا اظہار بھی کیا۔
ٹوئٹر پر کئی لوگوں نے اداکارہ شہروز سبزواری کو ہی علیحدگی کا قصور وار ٹھہرایا اور کئی لوگوں نے دعویٰ کیا کہ اداکار اپنی اہلیہ کے ساتھ دھوکا کر رہے تھے اور ان کے تعلقات کسی اور ماڈل سے تھے۔
دلچسپ بات یہ ہے کہ ’سائرہ‘ کا ٹرینڈ ٹاپ میں آنے کے باوجود سائرہ شہزور یا شہروز سبزواری نے اس حوالے سے کوئی ٹوئٹ نہیں کیا اور نہ اس حوالے سے کوئی بیان دیا۔
شہروز سبزواری اور سائرہ نے 2012 میں شادی کی تھی اور دونوں کو ایک بیٹی بھی ہے۔
ان کی جوڑی کا شمار شوبز انڈسٹری کی مقبول اور خوبصورت جوڑیوں میں ہوتا ہے اور دونوں کو ہر بار ایک ساتھ دیکھا گیا، تاہم گزشتہ چند ہفتوں کے دوران انہیں کسی بھی پارٹی میں ایک ساتھ نہیں دیکھا گیا۔
جہاں ان دونوں کی علیحدگی کی خبریں چل رہی ہیں، وہیں یہ بات اہم ہے کہ سائرہ شہروز کے سوشل میڈیا اکاؤنٹس پر ان کے نام کے ساتھ ’شہروز‘ کا نام اب بھی لگا ہوا ہے۔
