پاکستان ٹیم کے سپر اسٹار بولر شاہین شاہ آفریدی اور ماہناز بیٹر فخر زمان نے کریک انفو ایوارڈ اپنے نام کرلیے ہیں۔
کھیلوں کی ویب سائٹ ای ایس پی این کریک انفو نے ایوارڈ حاصل کرنے والے کھلاڑیوں کے ناموں کا اعلان کردیا ہے جبکہ ان ناموں میں 2 پاکستانی کھلاڑیوں کے نام بھی شامل ہیں۔
کریک انفو کے مطابق آئی سی سی ٹی ٹوئنٹی ورلڈ کپ میں بھارت کے خلاف شاندار بولنگ کا مظاہرہ کرنے پر شاہین شاہ آفریدی کو بہترین ٹی ٹوئنٹی بولر کا ایوارڈ دیا گیا ہے۔
پاکستان ٹیم کے ماہناز بیٹر و اوپنر فخر زمان کو کریک انفو نے جنوبی افریقہ کے خلاف 193 رنز کی غیر معمولی اننگ کھیلنے پر ایوارڈ سے نوازا گیا ہے۔
دوسری جانب کریک انفو نے بھارتی کھلاڑی رشبھ پنٹ کو بہترین ٹیسٹ بیٹر جبکہ نیوزی لینڈ کے کائل جیمیسن کو بہترین ٹیسٹ بولر کا ایوارڈ دیا ہے۔
ٹی ٹوئنٹی کے بہترین بیٹر کا ایوارڈ انگلش وکٹ کیپر جوز بٹلر کو دیا گیا ہے جبکہ انگلش بولر ثاقب محمود کو بہترین ون ڈے بولر کا ایوارڈ دیا گیا ہے۔
علاوہ ازیں سال کے بہترین کپتان کا ایوارڈ نیوزی لینڈ کے کپتان کین ولیمسن کو دیا گیا ہے۔
