طوفانی بارشوں اور سیلابی ریلوں نے ملک میں تباہی مچادی ہے، اس صورت حال پر سابق فاسٹ بالر شعیب اختر کا طنزیہ ٹوئٹ سامنے آیا ہے۔
سابق فاسٹ بولر اور راولپنڈی ایکسپریس شعیب اختر کا مائیکرو بلاگنگ سائٹ پر کہنا تھا کہ ’میرے عزیز ہم وطنو، سیلاب ملک میں تباہی مچارہا ہے‘۔
انہوں نے طنز کرتے ہوئے لکھا کہ ’چلو جلدی سے سب کھانے پینے کی چیزیں ذخیرہ کرلو اور قیمتیں 4 سے 5 گنا بڑھادو، کسی کی مدد نہیں کرنا‘۔
شعیب اختر نے مزید لکھا کہ ’یہی تو وقت ہے منافع کمانے کا اور یہ سب کرتے ہوئے سیاست دانوں کو گالیاں دینا مت بھولنا کیونکہ غلط تو صرف وہی ہیں‘۔
واضح رہے کہ طوفانی بارشوں اور سیلابی ریلوں نے بلوچستان میں تباہی مچادی ہے جب کہ خواتین اور بچوں سمیت 500 سے زائد افراد سیلابی پانی میں پھنس گئے ہیں۔
دوسری جانب بارش برسانے والا ایک اور مضبوط سسٹم شمالی بلوچستان میں داخل ہوگیا ہے جب کہ رابطہ سڑکیں بہہ جانے اور پل ٹوٹنے کے باعث بلوچستان کا ملک کے دیگر صوبوں سے رابطہ منقطع ہوگیا ہے۔
محکمہ موسمیات کا کہنا ہے کہ بارشیں برسانے والا ایک مضبوط سسٹم جنوب وسطی اور مغربی بلوچستان تک پھیل رہا ہے جس کے باعث چمن شہر کے نواحی علاقوں میں تیز ہواؤں کے ساتھ موسلا دھار بارشیں ہورہی ہیں۔
