بالی ووڈ کے سینئر اداکار سنیل شیٹی نے فلمساز بننے کے خواہشمند افراد کو اچھی فلم بنانے کا طریقہ بتادیا۔
سنیل شیٹی نے لنکڈ اِن پر اپنے مداحوں کو خوشخبری سنائی ہے کہ فلم’ہیرا پھیری3‘ کی شوٹنگ کا آغاز ہوگیا ہے۔
اُنہوں نےلکھا کہ’ہیرا پھیری 3‘ آخرکار بننے جارہی ہے، مجھے اب پریش جی اور اکشے کمار کے ساتھ سیٹ پر واپس آنے کا انتظار ہے۔
اُنہوں نے مزید لکھا کہ تمام اچھی چیزوں کی طرح، اس میں بھی کچھ وقت لگا۔
سنیل شیٹی نےشوبزنس کے بارے میں بات کرتے ہوئے لکھا کہ شوبزنس دوسرے کاروباروں سے مختلف نہیں ہے، یہاں فلمی کاروبار کی مکمل وضاحت کے بعد اس کو سمجھنا آسان ہوگا۔
اُنہوں نے لکھا کہ فلم بنانے کے لیے ایک اچھا اسکرپٹ ہونا، اداکاروں اور ہدایتکاروں کا انتخاب ہونا صرف آغاز ہے پھر فلم بننے کے بعد ایک اسٹوڈیو عام طور پر اس کی ریلیز کے لیے حقوق کسی ایک ڈسٹری بیوٹر کو فروخت کرتا ہے یا کمیشن کی بنیاد پر کسی کو مقرر کرتا ہے۔
اُنہوں نے مزید لکھا کہ ڈسٹری بیوٹر فلم کے لیے تھیٹر مالکان سے اسکرینز حاصل کرنے، شرائط پر گفت و شنید کرنے اور فلم کو تھیٹرز میں ریلیز کرنے کا ذمہ دار ہوتا ہے اور کبھی کبھی ڈسٹری بیوٹرز فلم کے باکس آفس کلیکشن میں سے بھی کچھ حصّہ وصول کرنے کی بات کرتے ہیں۔
سنیل شیٹی نے فلموں سے معاوضہ حاصل کرنے کے مختلف طریقوں کا ذکر کرتے ہوئے لکھا کہ’ملکی اور بین الاقوامی باکس آفس پر حاصل کردہ مجموعی رقم کسی بھی فلم کے لیے پیسے کمانے کا بنیادی ذریعہ ہے، فلمی میوزک کے حقوق کسی میوزک لیبل کو فروخت کرکے بھی فلمساز پیسے کما سکتے ہیں کیونکہ وہ میوزک کی اسٹریمنگ، لائسنسنگ، اور ڈیجیٹل اشتہار کے ذریعے آمدنی کو بڑھاتے ہیں۔
