بالی ووڈ کی معروف اداکارہ سشمیتا سین انڈسٹری میں کام کرتے ہوئے وقت کی پابندی کا ہمیشہ سے بہت خیال رکھتی ہیں۔
سشمیتا سین نے اپنے ایک حالیہ انٹرویو میں انکشاف کیا کہ مجھے شوٹنگ کے مقررہ اوقات پر قائم رہنے اور اپنی شفٹ ختم ہونے پر سیٹ چھوڑنے کی وجہ سے یہ کہا جاتا تھا کہ میرے ساتھ کام کرنا بہت مشکل ہے۔
اُنہوں نے بتایا کہ میں نے جب شوبز انڈسٹری میں قدم رکھا تو اس وقت اگر کوئی بالی ووڈ کے’خانز‘ یا پھر کسی بھی بڑے اداکار کے ساتھ کام کرتا تھا تو وہ اپنی شفٹ ٹائمنگ یا شوٹنگ کے دنوں کی تعداد کے بارے میں نہیں پوچھتا تھا۔
سشمیتا سین نے بتایا کہ لیکن میں نے خاص طور پر میک اپ اور اسٹائل ہوئے بالوں کے ساتھ شوٹنگ کروانے کے لیے 8 سے 10 گھنٹے کا وقت مقرر کرنے کو کہا۔
اُنہوں نے بتایا کہ میرا یہ اصول ہے کہ میں اپنے وقت پر آؤں گی اور وقت پر چلی جاؤں گی، مجھے اپنے اس اصول کی وجہ سے کہا جاتا تھا کہ میں بہت نخرے والی ہوں اور پتا نہیں خود کو کیا سمجھتی ہوں۔
اُنہوں نے یہ بھی بتایا کہ پھر ہوا یوں کے کسی نے بہت بہادری کے ساتھ مجھے اپنے ان شرائط کے ساتھ کام دیا اور محسوس کیا کہ میری وجہ سے پروڈکشن میں پیسے بچ رہے ہیں کیونکہ سب کچھ وقت پر ہو رہا تھا۔
سشمیتا سین نے بتایا کہ یہاں تک کہ میں نے 2002ء میں امیتابھ بچن، پریش راول اور اکشے کمار کے ساتھ فلم ’آنکھیں‘میں کام کیا تھا تب بھی میں اپنے وقت کی پابند رہی۔
اُنہوں نے بتایا کہ میں یہ کہہ کر سیٹ چھوڑتی تھی کہ’سر، میرا دن پورا ہو گیا ہے اور میرا مقصد کسی کو ناراض کرنا نہیں بلکہ نظم و ضبط کی پابندی کرنا ہے۔
