چیئرمین تحریک انصاف (پی ٹی آئی) کے خلاف 9 مئی کو جناح ہاؤس حملے کی تحقیقات کے لیے قائم مشترکہ تحقیقاتی ٹیم (جے آئی ٹی) کو دھمکیاں دینے کا مقدمہ درج کرلیا گیا۔
لاہور کے تھانہ قلعہ گجر سنگھ میں عمران خان کے خلاف رپٹ انچارج انویسٹی قلعہ گجر سنگھ محمد سرور کی مدعیت میں درج کی گئی۔
درج رپٹ کے متن کے مطابق چئیر مین پی ٹی آئی کو تھانہ سرور روڈ 96/23 میں تفتیش کے لیے بلایا گیا، 14 جولائی کو پیشی کے دوران چئیرمین پی ٹی آئی نے انگلی کے اشارے کے ساتھ جے آئی ٹی کے سربراہ عمران کشور اور دیگر ممبران کو دھمکایا۔
رپٹ کے مطابق سابق وزیراعظم نے دھمکی دی کہ پی ٹی آئی کی حکومت واپس آ رہی ہے، آپ سن لیں آپ نے رہنا نہیں ہے۔
اس میں کہا گیا کہ تفتیش کے دوران کسی بھی ملزم کا افسر کو ڈرا نا، حکومت میں آکر انتقامی کارروائی کا نشانہ بنانے کی دھمکی دینا آزادانہ اور غیر جانبدار تفتیش کو روکنا ہے، ملزم کا یہ عمل قانون کی خلاف ورزی ہے ۔
واضح رہے کہ پی ٹی آئی کے سربراہ 14 جولائی کو 9 مئی کو کور کمانڈر لاہور کی رہائش گاہ جناح ہاؤس کی توڑ پھوڑ کی تحقیقات کرنے والی مشترکہ تحقیقاتی ٹیم کے سامنے پیش ہوئے، 9 مئی سے متعلق کیسز میں تفتیش کا حصہ بنے اور اپنا بیان قلمبند کرایا تھا۔
سابق وزیراعظم کے وکیل علی اعجاز بٹر نے دعویٰ کیا تھا کہ عمران نے پوچھے گئے تمام سوالات کا جواب دیا، ہم نے لاہور کی انسداد دہشت گردی کی عدالت کے حکم کی تعمیل کی اور قانون کے مطابق کارروائی مکمل کر لی گئی ہے۔
عمران خان سے یہ پوچھ گچھ شہر کے سرور روڈ پولیس اسٹیشن میں توڑ پھوڑ کے سلسلے میں درج ایک مقدمے کے حوالے سے کی گئی۔
مقدمے میں ان پر حملہ آوروں کی مدد کا الزام لگایا گیا ہے جنہوں نے ان کی گرفتاری کے بعد جناح ہاؤس میں توڑ پھوڑ کی اور اسے آگ لگا دی تھی۔
9 مئی کو قومی احتساب بیورو کی جانب سے القادر ٹرسٹ کیس میں پی ٹی آئی کے سربراہ کی گرفتاری کے بعد مظاہرین ملک بھر میں سڑکوں پر نکل آئے تھے اور خاص طور پر لاہور میں کور کمانڈر کی رہائش گاہ پر توڑ پھوڑ کی اور راولپنڈی میں جنرل ہیڈ کوارٹرز کا ایک گیٹ توڑ دیا تھا۔
اس کے بعد عمران اور ان کی پارٹی کے کارکنوں کے خلاف مقدمات درج کیے گئے تھے۔
