برطانوی اسکرین رائٹر جمائما گولڈ اسمتھ نے اداکارہ اشنا شاہ اور گالفر حمزہ امین کی شادی میں شریک نہ ہونے پر افسوس کا اظہار کیا ہے۔
اشنا شاہ نے فوٹو اینڈ ویڈیو شیئرنگ ایپ انسٹاگرام پر اپنی شادی کی تقریب کی ویڈیو شیئر کی ہے۔
اس ویڈیو میں دولہا حمزہ امین اداکارہ اشنا شاہ کو لینے بارات لے کر سفید شیروانی میں پہنچے تو دلہن ڈیزائنر وردہ سلیم کے لال لہنگے میں جاذب نظر آئیں۔
اداکارہ نے ویڈیو کے کیپشن میں شوہر سے محبت کا اظہار کرتے ہوئے لکھا کہ ’میری نینو والے مہاراجہ سے شادی ہوگئی‘۔
اُنہوں نے اپنی فیملی اور دوستوں کا شکریہ ادا کرتے ہوئے لکھا کہ’دنیا کے مختلف مقامات سے میری خوشیوں میں شامل ہونے کے لیے آنے پر اپنے دوستوں اور خاندان والوں کی بہت مشکور ہوں‘۔
اُنہوں نے مزید لکھا کہ’میری بہن ماہا اور میرے دوست سب کو اکٹھا کرنے میں میرے ساتھ تھے‘۔
اس ویڈیو کو سوشل میڈیا صارفین کی جانب سے بہت پسند کیا جارہا ہے اور دلچسپ تبصرے بھی کیے جارہے ہیں۔
اشنا شاہ کی اس پوسٹ پر جمائما گولڈاسمتھ نے کمنٹ کرتے ہوئے لکھا کہ’آپ بہت خوبصورت لگ رہی ہیں‘۔
اُنہوں نے مزید لکھا کہ’میں بہت دکھی ہوں کیونکہ میں آپ کی شادی میں شریک نہیں ہوسکی، آپ سب کے لیے اور خاص طور پر آپ کی ساس کے لیے بہت سا پیار!‘
یاد رہے کہ اشنا شاہ نے گزشتہ برس 22 دسمبر کو سوشل میڈیا پر حمزہ امین کے ہمراہ تصاویر شیئر کرتے ہوئے مداحوں کو اپنی منگنی کی خوشخبری سنائی تھی اور اب گزشتہ روز وہ رشتۂ ازدواج میں منسلک ہوگئی ہیں۔
