بھارت کے مشہور ڈرامے تارک مہتا کا الٹا چشمہ کی مرکزی اداکارہ دیا بین کے کینسر میں مبتلا ہونے کی خبریں زیرِ گردش ہیں۔
بھارتی میڈیا رپورٹس کے مطابق کئی روز سے یہ خبریں سامنے آرہی تھیں کہ تارک مہتا کا الٹا چشمہ کی مرکزی اداکارہ دیشا وکانی (دیابین) گلے کے کینسر میں مبتلا ہوگئی ہیں اور اس کی وجہ ڈرامے میں ان کی جانب سے نکالی جانے والی منفرد آواز ہے۔
View this post on Instagram
ڈرامے میں دیا بین کا کردار ادا کرنے والی دیشا وکانی اب ڈرامے کا حصہ نہیں ہیں لیکن ان کے گلے کے کینسر میں مبتلا ہونے کی خبروں پر اب ان کے بھائی کا ردِ عمل سامنے آ گیا ہے۔
ڈرامے میں دیشا وکانی کے بھائی کا کردار ادا کرنے والے سندر لال حقیقی زندگی میں بھی ان کے بھائی ہیں جن کا نام مایور وکانی ہے انہوں نے بہن کے کینسر میں مبتلا ہونے کی خبروں کی تردید کردی ہے۔
مایور وکانی کا کہنا ہے کہ ایسی بہت ساری افواہیں آتی رہتی ہیں مگر ان میں کوئی سچائی نہیں، ان کی بہن صحت مند ہیں اس لیے ایسی باتوں میں کوئی سچائی نہیں۔
انہوں نے کہا کہ ہم اس طرح کی خبریں روز سنتے ہیں لہٰذا دیشا کے فینز کو ان پر یقین کر کے پریشان ہونے کی ضرورت نہیں۔
دوسری جانب ڈرامے میں روشن سنگھ سوڈی کا کردار کرنے والے جنیفر بنسی وال نے بھی دیشا کے کینسر میں مبتلا ہونے کی خبروں کو جھوٹ قرار دیتے ہوئے کہا کہ ان کا دیشا سے رابطہ رہتا ہے اس لیے ایسی کوئی بات نہیں۔
