پاکستان شوبز انڈسٹری کی معروف اداکارہ اُشنا شاہ نے اپنے ایک حالیہ انٹرویو میں ساتھی اداکار عثمان مختار کے ساتھ کام کرنے کے تجربے کے بارے میں بات کی۔
اُشنا شاہ نے ایک ویب شو میں بطور مہمان شرکت کی جہاں اُنہوں نے مختلف موضوعات پر دلچسپ گفتگو کی۔
اُنہوں نے اپنی حال ہی میں ریلیز ہونے والی فلم ’چکّڑ‘میں عثمان مختار کے ساتھ کام کرنے کے اپنے تجربے کے بارے میں بات کرتے ہوئے انکشاف کیا کہ مجھے شروع میں عثمان مختار سے نفرت ہوگئی تھی کیونکہ جب فلم کی شوٹنگ کا آغاز ہوا تو وہ مجھ سے بات نہیں کرتے تھے اور نہ ہی میرے ساتھ بیٹھتے تھے۔
اداکارہ نے بتایا کہ میں فلم میں عثمان مختار کی بیوی کا کردار ادا کر رہی تھی تو اس لیے جب وہ مجھ سے بات تک نہیں کر رہے تھے تو میں پریشان تھی کہ اس طرح سے تو اسکرین پر ہم دونوں کی کیمسٹری بالکل بھی متاثر کُن نہیں ہوگی۔
اُنہوں نے بتایا کہ عثمان مختار کے ایسے رویے کی وجہ سے مجھے لگا کہ وہ بدتمیز قسم کے انسان ہیں۔
اُشنا شاہ نے بتایا کہ عثمان مختار اور کبریٰ خان اچھے دوست ہیں اس لیے میں نے ایسی صورتحال دیکھ کر کبریٰ خان کو فون کیا اور ان سے شکایت لگائی کہ تمہارا دوست بہت بدتمیز ہے مجھ سے ڈھنگ سے بات تک نہیں کرتا۔
اُنہوں نے بتایا کہ میری بات سن کر کبریٰ خان نے کہا کہ عثمان مختار کم گو اور شرمیلے ہیں لیکن بہت اچھی شخصیت کے مالک ہیں۔
اداکارہ نے مزید بتایا کہ جب عثمان مختار کو یہ معلوم ہوا کہ میں نے کبریٰ خان کو کال کرکے ان کی شکایت کی ہے تو پھر اُنہوں نے نہ صرف مجھ سے بات کرنا شروع کردی بلکہ شوٹنگ کے دوران مجھے بہت تنگ بھی کیا اور اب ہم دونوں بہت اچھےدوست بن گئے ہیں۔
