’الف‘ کی آخری قسط نے سب کے دل جیت لیے

جیو ٹی کے مقبول ترین ڈرامہ سیریل ’الف‘ کی آخری قسط نے تمام لوگوں کے دل جیت لیے۔

روحانی اور رومانوی ڈرامہ سیریل ’الف‘ میں حمزہ علی عباسی اور سجل علی نے مرکزی کردار ادا کیا تھا اور اس کی پہلی قسط 5 اکتوبر 2019 کو نشر کی گئی تھی۔

بعد ازاں ڈرامے کی آخری قسط کے بعد مداحوں کی جانب سے ’الف‘ کے بہترین اختتام کو سراہا جا رہا ہے اور سپر ہٹ ڈرامے کی حوصلہ افزائی بھی کی جارہی ہے۔

حمزہ نامی صارف نے ’الف‘ کی تعریف کرتے ہوئے لکھا کہ ’یہ ڈرامہ ایک بہترین مثال ہے کہ اللہ جسے چاہے، جب چاہے عزت سے نوازتا ہے‘۔

حسنین قریشی نامی صرف کہتے ہیں کہ ’ایک تاریخی ڈرامہ اختتام  کو پہنچا‘، ساتھ ہی حسنین نے ڈرامے کی کاسٹ اور کہانی کی بھی حوصلہ افزائی کی۔

ایک اور صارف نے لکھا کہ ’ایک خوبصورت سفر اپنے اختتام کو پہنچا‘۔

معروف مصنفہ عمیرہ احمد کی جانب سے لکھے جانے والے ڈرامہ سیریل ’الف‘ میں مرکزی کردار ادا کرنے والے حمزہ علی عباسی کی جانب سے بھی ایک ٹوئٹ کیا گیا۔

حمزہ نے کہا کہ ’الف کا حصہ بننے پر اللہ کا شکر گزار ہوں جس کا مقصد لوگوں کو ان کی زندگیوں پر غور و فکر کرنے اور ان کو اللہ کے قریب ہونے میں مدد فراہم کرنا تھا‘۔

خیال رہے کہ ’الف‘ کے نشر ہونے سے قبل حمزہ علی عباسی نے کہا تھا کہ ڈرامہ ’الف‘ ایک ایسی مثال قائم کرے گا کہ کیسے ٹیلی ویژن کے میڈیم کو استعمال کر کے لوگوں کی زندگی کا عکس دکھایا جا سکتا ہے اور انہیں خالق حقیقی کے ساتھ تعلق سے جوڑا جاسکتا ہے۔

نامور ہدایت کار حسیب حسن کی ہدایت کاری میں بننے والا ڈرامہ سیریل ’الف‘ کی کہانی حقیقی اور مجازی محبت پر مبنی تھی۔