اسپورٹس بورڈ پنجاب (ایس بی پی) نے صوبے کے کھلاڑیوں کےلیے کیلنڈر ایئر میں 6 کروڑ روپے کی انعامی رقم مختص کردی۔
ذرائع کے مطابق ایس بی پی نے 3 برس کے کیلنڈر ایئر کو حتمی شکل دے دی ہے، اس انعامی رقم کو نگراں پنجاب کابینہ سے منظور کرایا جائے گا۔
ذرائع کے مطابق وہاب ریاض مکمل پروگرام کابینہ کے اجلاس میں پیش کریں گے، انڈر16 ٹیلنٹ ہنٹ کے لیے 10 کھیل رکھے گئے ہیں اور اس حوالے سے 25 لاکھ روپے کی انعامی رقم رکھی گئی ہے۔
ذرائع کے مطابق رائزنگ پنجاب گیمز میں 18 کھیلوں کے مقابلے رکھے گئے ہیں، ان کے لیے ڈھائی کروڑ روپے سے زائد کی انعامی رقم مختص ہے۔
ذرائع کے مطابق کھلاڑیوں کو ماہانہ وظیفے بھی دیے جائیں گے جبکہ یوم آزادی گیمز، قائد اعظم ڈے گیمز اور رستم پنجاب دنگل کے مقابلے ہوں گے۔
اس دوران پنک گیمز، رمضان گیمز، کوہسار گیمز، میرا تھن اور تیز ترین ایتھلیٹ کے مقابلے بھی کرائے جائیں گے، 8 مقابلوں کےلیے بھی خطیر انعامی رقم رکھی گئی ہے۔
