دنیا بھر میں پذیرائی حاصل کرنے والی تُرک سیریز ’ارطغرل غازی‘ کو پاکستان بھر میں خوب مقبولیت حاصل ہو رہی ہے۔
ارطغرل غازی اور اس کے تما م کردارپاکستان میں اس قدر مقبول ہوچکے ہیں کہ اس نے کامیابی میں ترکی جہاں یہ ڈرامہ تیار کیا گیا تھا کو بھی پیچھے چھوڑدیا ہے۔
ترکش ڈرامہ سیریل “ارطغرل غازی” میں ” حلیمہ سلطان” کا کردار ادا کرنیوالی ترک اداکارہ اسراء بلجیک نے پہلی مرتبہ پاکستان کےایک میگزین کو انٹرویو دیتے ہوئے ارطغرل غازی میں اپنے کردار کے بارے میں اظہار خیال کیا ہے ۔
اسرا کا کہنا ہے کہ ارطغرل غازی کی حلیمہ سلطان بالکل میری ہی طرح فطرت، لوگوں، جانوروں اور پودوں سے محبت کرتی ہے اور اُن کا احترام کرتی ہے۔
اسراء بلجیک نے سوالو ں کا جواب دیتے ہو ئے بتایا کہ ’ارطغرل غازی‘ میں حلیمہ سلطان اتنی ہی حساس اور مضبوط ہےجتنی میں حقیقی زندگی میں ہوں، حلیمہ بالکل میری ہی طرح اپنے دل کی آواز سنتی ہے لیکن اس کے ساتھ ہی کبھی اپنے دماغ اور اقدار کو نظرانداز نہیں کرتی۔
اداکارہ نے بتا یا کہ جب میں 6 سے 8 سال کی تھی تو اپنی آنٹی کے ساتھ تھیٹر دیکھنے جایا کرتی تھی ، وہاں سے میرے اندر اداکاری کا شوق پیدا ہوا، جس کے بعد میری والدہ مجھے مقامی تھیٹرز کے ذریعے اداکاری کی طرف لانے کا ذریعہ بنیں۔
ارطغرل غازی کی شہرت کے حوالے سے بات کرتے ہوئے اسراء بلجیک نے کہا کہ میں اُن تمام لوگوں کا ایک ایک کر کے شکریہ ادا کرنا چاہتی ہوں اوراُن کی بہت شکرگزاربھی ہوں جنہوں نےڈرامے میں میری اداکاری کو بے حد پسند کیااور اُسے سراہا۔
انہوں نے پاکستان کے مقام بابو سر کے پہاڑوں اور آزاد کشمیر کی وادی سے محبت کا اظہار کیا ہے۔
اپنے انٹرویو میں اسرا نےمزید کہا کہ میں اُمید کرتی ہوں میرا پہلا دورہ پاکستان بھی میرے دیگر دوروں پر مشتمل ڈاکومنٹری میں شامل ہو۔
میں پاکستان آکر وہاں کے حسین مقامات کی تصاویر بنانے کی خواہش رکھتی ہوں۔
انہوں نے کہا کہ مجھے پاکستان کے حسین ترین مقام بابو سر (کاغان) کے پہاڑوں سے محبت ہے۔
