پاکستان شوبز انڈسٹری کی خوبصورت اور مشہور اداکارہ ماورا حسین نے شاہ زیب قتل کیس کے فیصلے پر شدید ردِعمل دیا ہے۔
ماورا حسین نے سماجی رابطے کی ویب سائٹ ٹوئٹر پر اپنے جاری کردہ ایک بیان میں فیصلے سے متعلق ردِ عمل دیتے ہوئے کہا کہ ہمارے ملک کے امیر ہمارے نظامِ انصاف کا مذاق اڑا رہے ہیں۔
ان کا کہنا تھا کہ ہم سب غیر محفوظ ہیں اور کوئی قانون ہمیں تحفظ فراہم نہیں کر رہا، اللہ نہ کرے ہم میں سے کسی کو ایسی صورتحال کا سامنا کرنا پڑے۔
واضح رہے کہ گزشتہ روز سپریم کورٹ نے شاہ زیب قتل کیس کے ملزم شاہ رخ جتوئی کو بری کردیا جبکہ کیس کے دیگر ملزمان کو بھی بری کیا گیا۔
کیس کی سماعت جسٹس اعجاز الاحسن کی سربراہی میں تین رکنی بینچ نے کی تھی۔
وکیل لطیف کھوسہ نے کہا تھا کہ فریقین کا پہلے ہی راضی نامہ ہوچکا ہے۔ ملزمان کا دہشت پھیلانے کا کوئی ارادہ نہیں تھا۔ قتل کے واقع کو دہشگردی کا رنگ دیا گیا۔
ٹرائل کورٹ نے شاہ رخ جتوئی اور نواب سراج تالپور کو سزاے موت سنائی تھی جبکہ نواب سجاد غلام مرتضی کو عمر قید سنائی گئی تھی۔
سندھ ہائی کورٹ نے ٹرائل کورٹ کا فیصلہ تبدیل کرتے ہوئے اے ٹی اے کے تحت چاروں ملزمان کو عمر قید سنا دی تھی۔
ملزمان نے عمر قید کے خلاف سپریم کورٹ میں اپیلیں دائر کی تھیں۔
25 دسمبر 2012ء کو کراچی میں معمولی تنازع پر شاہ رخ جتوئی نے اپنے ساتھیوں کے ہمراہ شاہ زیب نامی نوجوان کو فائرنگ کر کے قتل کر دیا تھا۔ واقعے کے بعد شاہ رخ جتوئی دبئی فرارہو گیا، جسے وہاں سےگرفتار کرکے واپس پاکستان لایا گیا تھا۔
انسدادِ دہشت گردی کی عدالت نے 7 جون 2013ء کو جرم ثابت ہونے پر شاہ رخ جتوئی اور سراج تالپور کو سزائے موت جبکہ سجاد تالپور اور غلام مرتضیٰ لاشاری کو عمر قید کی سزا سنائی تھی۔
سابق چیف جسٹس آف پاکستان میاں ثاقب نثار نے مجرم شاہ رخ جتوئی کو سہولتیں فراہم کرنے پر لانڈھی جیل کے سپرنٹنڈنٹ کو معطل کر دیا تھا۔ انہوں نے لانڈھی جیل کے دورے کے دوران شاہ رخ جتوئی کو ڈیتھ سیل منتقل کرنے کی ہدایت بھی کی تھی۔
