نئی دہلی : بھارت کے معروف اسٹینڈ اپ کامیڈین منور فاروقی کو اپنی زندگی میں کن مصائب کا سامنا کرنا پڑا انہوں نے اپنے مداحوں کو سب بتادیا۔
انہوں نے ایک انٹرویو میں ماضی میں پیش آنے والے واقعات اور بدتر معاشی حالات کا ذکر کیا اور بتایا کہ کس طرح اپنے گھر کے اخراجات اٹھانے کیلئے جدوجہد کی۔
منور فاروقی نے زندگی کی تلخ حقائق سے پردہ اُٹھاتے ہوئے حیران کُن انکشاف کیا ان کا کہنا تھا کہ انہوں نے زندگی گزارنے کے لیے سموسے بیچ کر پیسے کمائے ہیں۔
انہوں نے بتایا کہ ان کے والد کا ایک ریسٹورنٹ تھا جس میں شدید مالی نقصان ہوا اور وہ قرضوں کے بوجھ تلے دب گئے، پھر میں نے کچھ کرنے کی ٹھانی اور ایک گفٹ شاپ پر ملازمت کرنا شروع کی جس کے لئے مجھے ساڑھے تین کلومیٹر تک پیدل جانا پڑتا تھا۔
انہوں نے مزید بتایا کہ کچھ عرصے بعد پھر میری والدہ اور دادی نے گھر میں سموسے بنانے شروع کیے جسے میں گھر کے باہر ایک چھوٹا سا اسٹال لگا کر فروخت کیا کرتا تھا، جس سے ماہانہ 850 روپے کما لیا کرتا تھا۔
واضح رہے کہ منور فاروقی نے کنگنا رناوت کے ریئلٹی ٹیلی ویژن شو لاک اپ سیزن 1 میں فتح حاصل کرنے کے بعد کافی مقبولیت حاصل کی۔ اس کے علاوہ منور لائیو شوز میں بھی نظر آتے ہیں جبکہ انکا ایک یوٹیوب چینل بھی موجود ہے۔
