پاکستان شوبز انڈسٹری کے معروف اداکار آغا علی نے اپنے پہلے یاد گار ہوائی جہاز کے سفر کا ذکر کرتے ہوئے بتایا کہ پوری پرواز کے دوران جہاز کے باتھ روم میں لاک رہا۔
حال ہی میں آغا علی نے ایک پوڈ کاسٹ میں بطور مہمان شرکت کی جہاں انہوں نے، شوبز اور زندگی کے مختلف پہلوؤں کے بارے میں بات کرنے کے علاوہ ملک کے مسائل پر بھی اپنی رائے کا اظہار کیا۔
انہوں نے اپنی زندگی کا دلچسپ واقعہ سناتے ہوئے بتایا کہ جب پہلی مرتبہ جہاز میں سوار ہوا تو بہت پُرجوش تھا حالانکہ یہ فلائٹ صرف 15 منٹ کی لاہور سے فیصل آباد تک کی تھی۔
انہوں نے بتایا کہ ایک دن کا سفر تھا اسی دن جانا اور اسی دن واپس آنا تھا تاہم واپسی کے سفر میں انہیں تجسس ہوا کہ جہاز کا باتھ روم کیسا ہوتا ہے۔
آغا علی 15 منٹ کی فلائٹ میں ٹیک آف کے بعد باتھ روم گئے تو وہاں لاک ہوگئے، مدد کے لئے کئی بار ایئر ہوسٹس کو آوازیں لگائیں، تاہم کسی نے نہیں سنا لیکن جب لینڈنگ کا وقت آیا تو ایئر ہوسٹس نے دروازہ کھول کر باہر نکالا۔
انہوں نے بتایا کہ اس وقت ایئر ہوسٹس نے انہیں بہت ڈانٹا اور سخت لہجے میں سیٹ پر جا کر بیٹھنے کا کہا جس کے بعد اداکار نے دوبارہ ہوائی جہاز کا سفر کرنے سے توبہ کرلی تھی۔
