اسلام آباد / لاہور: ملک میں بھر میں کووڈ 19 کی تازہ لہر کے نتیجے میں گزشتہ 24 گھنٹے میں مزید 2 ہزار سے زائد افراد کورونا وائرس سے متاثر ہوگئے جو ایک ماہ بعد ایک دن میں سب سے زیادہ کیسز ہیں جبکہ پنجاب کے 4 شہرہوں میں برطانیہ میں پائے جانے والا نئی قسم کا کورونا وائرس بھی موجود ہیں۔
مذکورہ تعداد میں نصف کا تعلق پنجاب سے ہے۔
نیشنل کمانڈ اینڈ کنٹرول سینٹر (این سی او سی) کے اعلامیے کے مطابق ملک بھر میں 2 ہزار 701 کیسز رپورٹ ہوئے جبکہ 29 جنوری کو ایک دن میں رپورٹ ہونے والے کیسز کی تعداد 2 ہزار 186 تھی۔
اعداد و شمار کے مطابق مثبت کیسز کی شرح 5.3 فیصد رہی جو فروری میں 4 فیصد سے نیچے تھی۔
این سی او سی کے مطابق یہ شرح بدھ کے روز کیے گئے 42 ہزار 164 کورونا ٹیسٹ کے نتائج پر مبنی تھی۔
جمعرات کے روز تک ملک میں فعال کیسز کی مجموعی تعداد 18 ہزار 703 رہی۔
این سی او سی کے بیان کے مطابق گزشتہ 24 گھنٹے کے دوران پنجاب سے ایک ہزار 632، اسلام آباد سے 384، خیبر پختونخوا سے 330، سندھ سے 255، آزاد جموں و کشمیر سے 86 اور بلوچستان سے 14 کیسز رپورٹ ہوئے۔
جمعرات دوسرا دن تھا جب ملک کے سب سے زیادہ آبادی والے صوبے میں ایک ہزار سے زیادہ کیسز رپورٹ ہوئے۔
اس صوبے میں گزشتہ 24 گھنٹوں کے دوران 36 افراد کی ہلاکت کی اطلاعات ہیں۔
پنجاب میں کورونا سے متاثرہ افراد کی مجموعی تعداد بڑھ کر ایک لاکھ 82 ہزار 576 جبکہ مرنے والوں کی تعداد 5 ہزار 698 ہوگئی ہے۔
دوسری جانب شعبہ صحت کے حکام نے بتایا کہ پنجاب کے چار شہروں میں 70 فیصد کیسز دراصل برطانیہ میں پائے جانے والے نئی قسم کے کورونا وائرس کی نشاندہی کرتے ہیں۔
چین سے درآمد شدہ این جی ایس نامی سسٹم کے ذریعے تیار کردہ اعداد و شمار کے مطابق برطانیہ میں پائے جانے والا نیا کورونا وائرس لاہور، جہلم، اوکاڑہ اور گجرات میں موجود ہے۔
محکمے کے ایک سینئر عہدیدار نے بتایا کہ صرف این جی ایس نظام کے ذریعے ہی وائرس کے رویے میں تبدیلی کی اصل وجہ معلوم کرنا ممکن ہے۔
انہوں نے کہا کہ این جی ایس سسٹم کو گزشتہ ماہ انسٹال کیا گیا تھا اور ہمیں متعدد نمونوں میں 60 مختلف حالتیں یا تغیرات ملے۔
