لاہور:
پاکستان نے فاضل رنز میں بھرپور فیاضی کا مظاہرہ کرتے ہوئے اپنا 25سال پرانا ریکارڈ برابر کردیا۔
64ایکسٹراز دینے والی ٹیم نے تاریخ میں سب سے زیادہ 17وائیڈز کا ’’اعزاز‘‘ بھی حاصل کرلیا، نسیم شاہ ایک ٹیسٹ اننگز میں دوسرے مہنگے ترین پاکستانی بولر بن گئے،رواں صدی میں گرین کیپس کیخلاف سب سے زیادہ 13شراکتوں میں 300یا زائد رنز بنے۔
دوسرا ٹیسٹ،پاکستان کے 4بولرز نے رنز دینے کی سنچری مکمل کرلی
کرائسٹ چرچ ٹیسٹ میں پاکستان کے 4بولرز نے رنز دینے کی سنچری مکمل کی،ظفر گوہر نے 159اور نسیم شاہ نے 141رنز دیے اور کوئی وکٹ نہ حاصل کرپائے۔
فہیم اشرف نے 106، شاہین شاہ آفریدی نے 101 اور محمد عباس نے 98رنز دے کر 2،2شکار کیے،پارٹ ٹائم بولرز میں سے شان مسعود نے 2اور حارث سہیل نے ایک اوور کیا،بے جان بولنگ اور ناقص فیلڈنگ کی وجہ سے کیویز کو 4.15کی اوسط سے رنز بنانے کا موقع ملا۔
یاد رہے کہ قومی ٹیم کے بولنگ کوچ وقار یونس بولرز کو دوسرے میچ کیلیے ’’بھرپور‘‘ تیاری کرانے کے بعد دوسرے ٹیسٹ سے قبل ہی رخصت پر پاکستان واپس آگئے تھے۔
