وفاقی وزیر اطلاعات عطااللہ تارڑ نے 9 مئی کے واقعات کے حوالے سے ناقابلِ تردید شواہد پیش کرنے کے طور پر سی سی ٹی وی فوٹیجز میڈیا پر جاری کیں اور مطالبہ کیا کہ زیر التوا تمام کیسز کا جلد فیصلہ کیا جائے۔
لاہور میں پریس کانفرنس کے دوران، وزیر اطلاعات نے 9 مئی کو فوجی تنصیبات پر حملوں کی نئی سی سی ٹی وی فوٹیجز دکھائیں، جو پہلے کبھی منظر عام پر نہیں آئی تھیں۔ ان کا کہنا تھا کہ یہ فوٹیجز اس بات کے ناقابل تردید ثبوت ہیں کہ ان حملوں کے پیچھے ایک منظم سازش تھی، جسے عمران خان اور ان کے ساتھیوں نے عملی جامہ پہنایا۔
عطا اللہ تارڑ نے کہا کہ عمران خان اور ان کے حامیوں نے ہر قدم پر ملک کو نقصان پہنچایا اور 9 مئی کو حملے کرنے کے لیے ایک جماعت نے سازش کی تھی۔ انہوں نے مزید کہا کہ عمران خان بار بار کہتے رہے ہیں کہ ان کے لوگ اس واقعے میں ملوث نہیں ہیں، لیکن اب جب ثبوت سامنے ہیں تو وہ کیا کہتے ہیں؟ “اگر ہمارے لوگ ملوث ہوئے تو ہم معافی مانگنے کے لیے تیار ہیں۔”
وزیر اطلاعات نے پی ٹی آئی کے رہنماؤں اور عمران خان کی دعوے کی مخالفت کرتے ہوئے کہا کہ آج یہ فوٹیجز قوم کے سامنے لائی جا رہی ہیں، جن میں یاسمین راشد، شہریار آفریدی، عثمان ڈار، مراد سعید اور دیگر پی ٹی آئی رہنماؤں کو فوجی تنصیبات پر حملے کرتے ہوئے دکھایا گیا ہے۔ ان کے مطابق، مراد سعید نے ویڈیو پیغام میں لوگوں کو اپنے اہداف تک پہنچنے کی ہدایت دی تھی، اور شہریار آفریدی نے جی ایچ کیو جانے کی بات کی۔ اسی طرح یاسمین راشد نے گاڑی کی چھت پر کھڑے ہو کر کور کمانڈر ہاؤس جانے کا اعلان کیا۔
عطا تارڑ نے کہا کہ یہ تمام حملے پی ٹی آئی کے رہنماؤں کی ہدایات پر کیے گئے، جن کا مقصد اپنے سیاسی بیانیے کو مضبوط کرنا تھا۔ ان کے مطابق، فوجی اور دفاعی تنصیبات پر حملے، شہدا کی یادگاروں کی بے حرمتی اور توڑ پھوڑ کی گئی، اور یہ سب کچھ پی ٹی آئی نے ملک میں اپنے سیاسی مفادات کے لیے کیا۔
وفاقی وزیر نے مزید کہا کہ عمران خان بار بار سوال کرتے تھے کہ 9 مئی کے واقعات کو روکا کیوں نہیں گیا؟ اب ان فوٹیجز کے ذریعے وہ سوالات کے جوابات مل گئے ہیں۔ انہوں نے کہا کہ پولیس نے تمام فسادیوں کو روکا اور عمران خان کا منصوبہ ناکام بنایا، جو چاہتا تھا کہ لاشیں گریں۔
عطا تارڑ نے پی ٹی آئی کے رہنماؤں سے سوال کیا کہ وہ بتائیں کہ ملک کو تباہ کرنے کی کوششیں کس نے کیں؟ “کس نے آئی ایم ایف کو خط لکھ کر پاکستان کو ڈیفالٹ کرنے کی کوشش کی؟ طالبان کو واپس لانے کا فیصلہ کس نے کیا؟ 9 مئی کے واقعات کس نے کرائے؟” انہوں نے کہا کہ یہ سب کچھ وہ نہیں کر سکتے تھے جو پی ٹی آئی کے حواریوں نے کیا۔
وزیر اطلاعات کا کہنا تھا کہ پی ٹی آئی کے رہنماؤں کے پیغامات اور ہدایات موجود ہیں، اور 9 مئی کے واقعات کے پیچھے ایک منظم سازش تھی۔ انہوں نے کہا کہ سی سی ٹی وی فوٹیجز کا ریکارڈ تبدیل نہیں کیا جا سکتا اور نہ ہی اسے مٹایا جا سکتا ہے، اور ان ویڈیوز میں جو شواہد ہیں وہ قوم کے سامنے آ چکے ہیں۔
عطا تارڑ نے مطالبہ کیا کہ 9 مئی کے واقعات کے مقدمات کا فوری فیصلہ کیا جائے اور ملزمان کو کیفر کردار تک پہنچایا جائے۔ انہوں نے کہا کہ ان تمام شواہد کے سامنے آنے کے بعد پی ٹی آئی کے رہنماؤں کو معافی مانگنی چاہیے اور مقدمات کا سامنا کرنا چاہیے۔
وزیر اطلاعات نے مزید کہا کہ دشمنوں کے ایجنڈے کو فروغ دینے والوں کے خلاف سخت کارروائی کی جائے اور ان کے ناپاک عزائم کو ناکام بنایا جائے، کیونکہ اب تمام ثبوت قوم کے سامنے ہیں۔
