پاکستان شوبز انڈسٹری سے وابستہ سینئر اداکارہ صبا حمید نے حال ہی میں انٹرویو دیتے ہوئے شادی شدہ زندگی پر کھل کر بات کی اور کہا کہ اپنے گھر میں آزادانہ ماحول دیکھا جس کی وجہ سے کبھی احساس ہی نہیں ہوا کہ کسی بھی کام سے پہلے شوہر کی اجازت بھی لینی ہوتی ہے۔
اداکارہ صبا حمید نے حال ہی یوٹیوب کے پوڈکاسٹ کو انٹرویو دیتے ہوئے شادی سے متعلق اپنی رائے، بچوں اور کریئر سے متعلق تفصیلی گفتگو کی۔
انہوں نے دورانِ انٹرویو ایک سوال کا جواب دیتے ہوئے بتایا کہ ان کے والد یعنی کالم نگار اور صحافی حمید اختر نے اپنے تمام بچوں (4 بیٹیوں اور ایک بیٹے) کی پرورش ایسے کی کہ انہیں زندگی کے کسی بھی موڑ پر کبھی کسی پر انحصار کرنے کی ضرورت محسوس نہیں ہوئی۔
انہوں نے کہا کہ میرے والد بہت بڑے فیمینسٹ تھے، ان کے لئے یہ اصطلاح شاید ٹھیک ہے یا نہیں پتہ نہیں لیکن وہ اپنی آخری سانس تک برابری کے حقوق پر بہت یقین رکھتے تھے۔
صبا حمید نے کہا کہ جب تک والدین زندہ تھے تو ہم بہن بھائیوں کو کبھی محسوس ہی نہیں ہوا کہ کسی ایک کو زیادہ اہمیت دی جا رہی ہے اور کسی ایک کو کم، سب کے ساتھ یکساں سلوک ہوتا تھا، ہمیں جہاں جانا ہوتا ہم چلے جاتے تھے، اگر بھائی کو گاڑی چلانے کی اجازت تھی تو ہم بہنوں کو بھی تھی، اگر گھر دیر سے آنے پر ہم بہنوں کو ڈانٹ پڑتی تھی تو بھائی کو بھی ڈانٹا جاتا تھا، اسی وجہ سے مجھے لگا کہ دنیا میں بھی ایسا ہی ہوتا ہو گا۔
اداکارہ نے کہا کہ مجھے نہیں معلوم تھا کہ دنیا مختلف بھی ہو سکتی ہے، مجھے دنیا کے بارے میں بہت دیر سے معلوم ہوا کیونکہ گھر میں آزاد خیال ماحول تھا، میری والدہ آزاد خیال خاتون تھیں، وہ تھوڑی بہت قدامت پسند سوچ ضرور رکھتی تھیں لیکن میرے والد انہیں آزاد خیال رکھتے تھے۔
انہوں نے مثال پیش کرتے ہوئے کہا کہ امی کو اپنے بہن کے گھر جانا ہوتا تو والد کو صرف یہ کہتی تھیں کہ میں اسلام آباد جا رہی ہوں پرسوں تک آ جاؤں گی، جس پر والد اخبار پڑھتے ہوئے کہتے ’اوکے‘، ہم نے اپنے گھر میں یہ ماحول دیکھا اور میں یہی سمجھتی تھی کہ پوری دنیا میں ایسا ہوتا ہے۔
صبا حمید نے کہا کہ مجھے بہت عرصے بعد پتہ چلا کہ شادی کے بعد کسی بات کے لیے اپنے شریک حیات سے بھی اجازت لینی پڑتی ہے، مجھے تو معلوم ہی نہیں تھا۔
انہوں نے کہا کہ شاید میری شادی میں بہت سے مسائل اسی لیے پیش آئے، میں نے ہمیشہ وہی کیا جو مجھے صحیح لگا اور میں اب بھی یہی کرتی ہوں۔
خیال رہے کہ صبا حمید کی شادی سید پرویز شفیع سے ہوئی تھی جن سے ان کے دو بچے میشا شفیع اور فارس شفیع ہیں۔
