لاہور:
گزشتہ روز پشاور میں ہونے والے پی سی بی بورڈ آف گورنرز کے اجلاس میں ہیڈکوچ و چیف سلیکٹر مصباح الحق نے ستمبر 2019 میں عہدے کا چارج سنبھالنے سے اب تک قومی ٹیم کی کارکردگی پر تفصیلی بریفنگ دی، انھوں نے اراکین کو کھلاڑیوں کی فٹنس، ڈومیسٹک کرکٹ، ایونٹس کے شیڈول، ٹیم کی تیاری، کھلاڑیوں کے انتخاب کا طریقہ کاراور مستقبل کی حکمت عملی کے بارے میں آگاہ کیا۔
پی سی بی کی پریس ریلیز کے مطابق بی او جی اراکین نے مصباح الحق کی محنت کوسراہتے ہوئے کہا کہ کھیل اور ٹیم کی کارکردگی میں بہتری لانے کیلیے تیار کی جانے والی حکمت عملی پرعمل پیرا رہا جائے۔
مصباح الحق نے کہا کہ بی او جی اراکین کے ساتھ طویل تبادلہ خیال مثبت رہا، اجلاس میں مستقبل کے حوالے سے چند مثبت تجاویز بھی سامنے آئیں۔انہوں نے کہاکہ وہ قومی کرکٹ ٹیم کی کارکردگی سے مطمئن، تاہم ابھی مزید کام کرنے کی ضرورت ہے، گزشتہ 5 ماہ میں قومی کرکٹ ٹیم کے کھلاڑیوں کی فٹنس میں واضح بہتری آئی ہے جس سے ان کے اعتماد میں اضافہ اور مثبت اثر کارکردگی پر بھی پڑا۔
