ٹی وی و فلم انڈسٹری کی معروف اداکارہ حمیمہ ملک نے ماضی میں دیئے گئے اپنے ایک بیان پر اداکار، گلوکار و میزبان محسن عباس حیدر سے معافی مانگ لی۔
کچھ روز قبل اداکارہ حمیمہ ملک نے نجی ٹی وی کے شو میں شرکت کی، اس شو کے میزبانی کے فرائض محسن عباس حیدر انجام دے رہے تھے۔
ٹاک شو کے دوران حمیمہ ملک نے اداکار محسن عباس حیدر سے بالواسطہ طور پر ماضی میں ادا کیے گئے سخت الفاظ پر معافی مانگ لی۔
شو کے دوران حمیمہ ملک نے اس بات کی تو وضاحت نہیں کی کہ وہ کس خاص بیان کا حوالہ دے رہی ہیں مگر سوشل میڈیا صارفین نے بھانپ لیا کہ وہ کس بیان پر شرمندگی کا اظہار کر رہی ہیں۔
یاد رہے کہ ماضی میں اداکار محسن عباس حیدر پر سابقہ اہلیہ فاطمہ سہیل پر گھریلو تشدد کا الزام لگ چکا ہے۔
اُس دوران حمیمہ ملک اور اُن کی بہن، اداکارہ دعا ملک نے محسن عباس کو سوشل میڈیا پر برا بھلا کہا تھا اور ان کی اہلیہ کا ساتھ دیا تھا۔
حال ہی میں شو کے دوران بات کرتے ہوئے اداکارہ حمیمہ ملک کا محسن عباس کو مخاطب کرتے ہوئے کہنا تھا کہ میں نے اگر کبھی زندگی میں آپ کے لیے کچھ غلط یا سخت کہا ہو تو میں اس کے لیے معافی مانگتی ہوں۔
حمیمہ نے محسن کو گلے لگاتے ہوئے کہا کہ میں آن اسکرین بولنا چاہتی ہوں کے وقت بدلتے ہیں، لوگ بدلتے ہیں، اندازِ بیان بدل جاتے ہیں۔
واضح رہے کہ 2019ء میں، محسن عباس حیدر کی سابقہ اہلیہ، فاطمہ سہیل کی جانب میزبان پر ایک سے زائد ازدواجی تعلقات رکھنے اور گھریلو تشدد کا الزام لگایا گیا تھا۔
محسن عباس کی اہلیہ کا کہنا تھا کہ جب میں نے محسن کو رنگے ہاتھوں پکڑا تو اس نے مجھے تشدد کا نشانہ بنایا، میں اس وقت حاملہ تھی جب مجھ پر تشدد کیا گیا۔
اِن الزامات کے منظر عام پر آنے کے بعد کئی مشہور شخصیات نے محسن کو ان کے رویے پر تنقید کا نشانہ بنایا تھا جن میں حمیمہ اور ان کی بہن دعا بھی شامل تھیں۔
اس وقت حمیمہ نے ٹوئٹر پر فاطمہ سہیل کے لیے اپنی حمایت اور محسن کے لیے غصے کا اظہار کیا تھا۔
