لاہور: پی ایس ایل 8 میں لاہور قلندرز ہوم گراؤنڈ پر فتوحات کی ہیٹ ٹرک کیلیے پُرعزم ہیں۔
پی ایس ایل 8 میں لاہور قلندرز نے 5 میں سے 4میچز جیتے ہیں،ٹیم جمعرات کو ہوم گراؤنڈ قذافی اسٹیڈیم میں مسلسل تیسری فتح پانے کا عزم لیے میدان میں اترے گی، اس بار کوئٹہ گلیڈی ایٹرز سے مقابلہ ہوگا۔
پہلے میچ میں میزبان ٹیم نے پشاور زلمی کیخلاف241رنز بناکر 40رنز سے فتح پائی تھی،دوسرے میچ میں اسلام آباد یونائیٹڈ کیخلاف 200رنز بنا کر 110 کے مارجن سے کامیابی حاصل کی، لاہور قلندرز کے ٹاپ 4 بیٹرز فخرزمان، طاہر بیگ، عبداللہ شفیق اور سیم بلنگز زبردست فارم میں ہیں۔
حسین طلعت، سکندر رضا، ڈیوڈ ویزا اور راشد خان مختصر مگر اچھے اسٹرائیک ریٹ سے کارآمد اننگز کھیلنے میں کامیاب ہوئے،اسی وجہ سے بڑے اسکور بنانے میں آسانی ہورہی ہے،پشاور زلمی سے میچ کے دوران چند بولرز کی کارکردگی میں تسلسل نہیں تھا مگر اسلام آباد یونائیٹڈ کی بیٹنگ لائن کے پرخچے اڑانے میں سب نے کردار ادا کیا۔
پیسرز شاہین شاہ آفریدی، حارث رؤف،زمان خان اور ڈیوڈ ویزا حریفوں کیلیے سخت مشکلات کا سبب بن رہے ہیں، اسپنرز راشد خان اور سکندر رضا کا سامنا بھی آسان نہیں۔
حریف ٹیم کوئٹہ گلیڈی ایٹرز نے 5میچز میں صرف ایک فتح حاصل کی،مارٹن گپٹل نے ابھی تک ایک بڑی اننگز کھیلی، جیمز ونس واپس جا چکے، ول اسمیڈ کا بیٹ نہیں چل رہا، محمد حفیظ، کپتان سرفراز احمد اور افتخار احمد میچ وننگز اننگز نہیں کھیل پارہے۔
بولنگ میں نسیم شاہ اور محمد حسنین کی کارکردگی اتار چڑھاؤ کا شکار ہے،اسپنرز محمد نواز اور افتخار احمد کا جادو بھی نہیں چل رہا،اس بار ٹیم سے بہتر کھیل کی توقع ہے۔
