بالی ووڈ کی بلاک بسٹر فلم’3 ایڈیٹس‘ کے معروف اداکار کچن میں کام کرتے ہوئے گرنے کے بعد چل بسے۔
بھارتی میڈیا رپورٹ کے مطابق، فلم’3 ایڈیٹس‘ کے اداکار اکھل مشرا کی موت کی تصدیق ان کی اہلیہ سوزین برنرٹ نے کی ہے۔
رپورٹ میں اداکار کے قریبی ذرائع کا حوالہ دیتے ہوئے بتایا گیا ہے کہ 58 سالہ اکھل مشرا گزشتہ کچھ عرصے سے بلڈ پریشر کے مرض میں مبتلا تھے اور اسٹول پر بیٹھے کچن میں کچھ کام کر رہے تھے کہ اچانک سِلپ ہوکر گر گئے۔
بھارتی میڈیا کی رپورٹ کے مطابق اس حادثے میں اداکار کے سر پر چوٹ لگنے سے خون بہنے لگا پھر جب اُنہیں وہاں سے اُٹھایا گیا تو کچن میں خون ہی خون ہوگیا۔
رپورٹ میں بتایا گیا ہے کہ حادثے کے وقت اداکار کی اہلیہ سوزین برنرٹ شوٹنگ کے سلسلے میں حیدرآباد میں تھیں جو اطلاع ملتے ہی فوری طور پر اپنے گھر پہنچیں لیکن تب تک ان کے شوہر جان کی بازی ہار چکے تھے۔
بعد ازاں، اداکار اکھل مشرا کی لاش کو پوسٹ مارٹم کے لیے بھجوا دیا گیا۔
یاد رہے کہ اداکار نے فلم’3 ایڈیٹس‘ میں لائبریرین ’دوبے‘ کا کردار نبھایا تھا جوکہ آج بھی مقبول ہے۔
