بالی ووڈ کی معروف اداکارہ عالیہ بھٹ کی اسرائیلی اداکارہ گال گیڈوٹ اور آئرش اداکار جیمی ڈورنن کے ساتھ ایک ویڈیو سوشل میڈیا پر وائرل ہورہی ہے۔
یہ وائرل ویڈیو عالیہ بھٹ، گال گیڈوٹ اور جیمی ڈورنن کے اپنی نئی فلم ’ہارٹ آف اسٹون‘ کی پروموشن کے سلسلے میں دیے گئے ایک حالیہ انٹرویو کی ہے۔
اس انٹرویو کے دوران عالیہ بھٹ نے اپنے بارے میں انٹرنیٹ پر سرچ کیے جانے والے سوالوں کے جواب بھی دیے۔
ان کے بارے میں انٹرنیٹ پر یہ سوال بھی بہت زیادہ سرچ کیا گیا ہے کہ’کیا عالیہ بھٹ تیلگو زبان بول سکتی ہیں؟‘
عالیہ بھٹ نے اس سوال کا جواب دینے سے پہلے گال گیڈوٹ اور جیمی ڈورنن کو بتایا کہ ’تیلگو ہندوستان میں بولی جانےوالی ایک زبان ہے، ابھی ساؤتھ انڈین فلم’RRR‘ کے جس گانے کو آسکر ایوارڈ ملا ہے وہ گانا بھی تیلگو زبان میں تھا‘۔
اُنہوں نے بتایا کہ میں اس زبان کو روانی سے بولنا نہیں جانتی لیکن میں اس زبان کے چند الفاظ جانتی ہوں جیسے کہ میں ’ادریکی نمسکارم یعنی(سب کو ہیلو) کہوں گی‘۔
جس پر عالیہ بھٹ کے ساتھ وہاں موجود گال گیڈوٹ نے بھی تیلگو زبان کو بولنے کی کوشش لیکن جیمی ڈورنن نے ہتھیار ڈال دیے۔
واضح رہے کہ عالیہ بھٹ نے فلم’ہارٹ آف اسٹون‘ سے ہالی ووڈ میں ڈیبیو دیا ہے جوکہ آج نیٹ فلکس پر ریلیز ہوئی ہے۔
