قومی کرکٹ ٹیم کے نوجوان فاسٹ بولر شاہین شاہ آفریدی خیبر پختونخوا پولیس کے خیر سگالی سفیر مقرر ہوگئے ہیں۔
تفصیلات کے مطابق چیف سیکرٹری خیبر پختونخوا شہزاد خان بنگش اور انسپکٹر جنرل آف پولیس خیبر پختونخوا معظم جاہ انصاری نے سپر اسٹار کرکٹر کو ڈی ایس پی کے اعزازی رینک لگائے۔
بعد ازاں تقریب سے خطاب کرتے ہوئے شاہین شاہ آفریدی نے عوام کے لیے پولیس کی خدمات کو سراہا۔
22 سالہ فاسٹ بولر نے کہا کہ میرے والد پولیس افسر تھے اور میرا بھائی بھی پولیس افسر ہے۔
انہوں نے مزید کہا پولیس افسران اور دیگر سیکیورٹی اہلکار ہمارے ملک کے حقیقی ہیرو ہیں اور وہ ہر طرح کی عزت و تکریم کے مستحق ہیں۔
خیال رہے کہ شاہین شاہ آفریدی صرف 22 سال کی عمر میں نہ صرف پاکستان بلکہ انٹرنیشنل کرکٹ میں بھی اپنا لوہا منوا چکے ہیں۔ وہ اپنے کیریئر کے ابتدائی 4 سالوں میں ہی سپر اسٹار بن چکے ہیں۔
شاہین شاہ آفریدی 18 سال کی عمر میں 3 اپریل 2018 کو کراچی میں ویسٹ انڈیز کے خلاف ایک ٹی ٹوئنٹی میچ سے اپنے انٹرنیشنل کیریئر کا آغاز کیا تھا۔
انہوں نے ون ڈے ڈیبیو 21 ستمبر 2018 میں افغانستان کے خلاف اور ٹیسٹ ڈیبیو 3 دسمبر 2018 کو نیوزی لینڈ کے خلاف کیا تھا۔
