کراچی: ایس ایس جی سی نے سندھ کے تمام سی این جی اسٹیشنز کو 72 گھنٹوں کے لیے گیس کی فراہمی بند کرنے کا اعلان کیا ہے۔
سوئی سدرن گیس کمپنی (ایس ایس جی سی) نے گیس لوڈ مینجمنٹ پلان ترتیب دے دیا ہے جس کے تحت صوبہ سندھ کے تمام سی این جی اسٹیشنز کو جمعہ سے پیر تک 72 گھنٹوں کے لیے گیس کی فراہمی بند رہے گی۔
ترجمان سوئی گیس کا کہنا ہے کہ 4 مارچ کی صبح 8 بجے سے پیر کی صبح 8 بجے تک گیس کی فراہمی بند رہے گی۔
واضح رہے کہ گذشتہ ہفتے بھی سندھ کے تمام سی این جی اسٹیشنز کو جمعہ 25 فروری کی صبح 8 بجے سے پیر 28 فروری کی صبح 8 بجے تک 72 گھنٹوں کے لیے گیس کی فراہمی بند کردی گئی تھی۔
سوئی سدرن گیس کمپنی کے ترجمان کا اس حوالے سے کہنا تھا کہ گھریلوصارفین کی ضروریات پوری کرنے کیلئے سی این جی اسٹیشنز کی بندش کا فیصلہ کیا گیا ہے۔
یاد رہے کہ اس سے قبل ایس ایس جی سی نے کراچی سمیت سندھ بھر میں سی این جی اسٹیشنز کو ڈھائی ماہ کے لیے بند کردیا تھا۔
