کولمبو:
سری لنکا ایک بار پھر پاکستانی میدان آباد کرنے کیلیے تیارہے لہٰذا دسمبر جنوری میں آئی لینڈرز پاکستان کا مختصر ٹور کرسکتے ہیں۔سری لنکا نے ایک بار پھر ٹیم کو پاکستان بھیجنے کی خواہش کا اظہار کیا ہے، ایس ایل سی کے صدر شمی سلوا نے کہاکہ ہم اپنی قومی ٹیم پاکستان بھیجنے کو تیار ہیں مگر صرف ایک رکاوٹ ہے، ہمارا سال کے آخری 3 ماہ کا شیڈول کافی مصروف ہوگا،اس کے باوجود انھوں نے مختصر ٹور کیلیے ونڈو کی دستیابی کا یقین بھی دلا دیا۔
شمی سلوا نے کہا کہ فی الحال تو ہمارے پاس زیادہ وقت نہیں ہے، آئندہ ماہ شیڈول ٹی20 ورلڈ کپ سے واپسی کے بعد ویسٹ انڈیزکی میزبانی کرنا ہوگی، اس کے بعد 4 سے 23 دسمبر تک لنکا پریمیئر لیگ کھیلی جائے گی،پھر اگر ہمارے پاس مناسب وقت ہوا تو ہم پاکستان کا ٹور کرسکتے ہیں۔
انھوں نے مزید کہاکہ اس سے قبل بھی ہم نے ٹیم کو پاکستان بھیجا اور اب بھی وہاں کا ٹور کرنے والا پہلا ملک بن سکتے ہیں۔
یاد رہے کہ اس سے پہلے بورڈ کے سیکریٹری موہن ڈی سلوا بھی پاکستان کی مشکل وقت میں مدد کرنے کا عزم ظاہر کرچکے ہیں۔ پاکستان نے بھی ماضی میں سری لنکا کا اس وقت بھرپور ساتھ دیا جب غیرملکی ٹیمیں خانہ جنگی کی وجہ سے دورہ کرنے سے کتراتی تھیں، جب 1996 کے ورلڈ کپ میں آسٹریلیا اور ویسٹ انڈیز نے سری لنکا میں میچز کھیلنے سے انکار کیا تب وسیم اکرم اور اظہرالدین کی قیادت میں پاکستان اور بھارت کی ٹیمیں یکجہتی کیلیے سری لنکا گئی تھیں۔
