تیسرا ٹی 20: آسٹریلیا کے خلاف بیٹنگ، قومی ٹیم ابتدا ہی میں مشکلات کا شکار

پاکستان اور آسٹریلیا کے درمیان 3 ٹی ٹوئنٹی میچز کی سیریز کے تیسرا اور آخری میچ میں آسٹریلیا کے خلاف بیٹنگ میں قومی ٹیم ابتدا سے ہی مشکلات کا شکار ہے اور نصف اننگ سے قبل ہی 4 کھلاڑی پویلین لوٹ چکے ہیں۔

آسٹریلیا کے شہر پرتھ میں کھیلے جارہے تیسرے ٹی20 میں آسٹریلوی کپتان ایرون فنچ نے ٹاس جیت کر پاکستان کی ٹیم کو پہلے بیٹنگ کی دعوت دی۔

ٹی20 ٹیم کے کپتان بابر اعظم نے امام الحق کے ہمراہ آسٹریلیا کے خلاف اننگ کا آغاز کیا لیکن گزشتہ 2 میچز کے برعکس کپتان بابر اعظم اچھی کارکردگی نہ دکھاسکے اور دوسرے اوور میں 6 رنز بنا کر آؤٹ ہوگئے۔

بابر اعظم کے بعد وکٹ کیپر بلے باز محمد رضوان میدان میں آئے لیکن دوسرے اوور کی تیسری بال صفر پر ہی آؤٹ ہوگئے۔

محمد رضوان کے بعد حارث سہیل نے ٹیم کی بیٹنگ لائن کو سنبھالنے کی کوشش کی لیکن اس مرتبہ اوپنر امام الحق 22 کے مجموعی اسکور پر 14 رنز بناکر آؤٹ ہوگئے۔

امام الحق کے بعد افتخار حسین نے ٹیم نے بیٹنگ کا ذمہ اٹھایا لیکن حارث سہیل 54 کے مجموعی اسکور پر نویں اوور میں 8 رنز بنا کر آؤٹ ہوگئے

آج کے میچ میں پاکستان کی ٹیم میں 4 تبدیلیاں کی گئی ہیں اور فخرزمان، آصف علی، محمد عرفان اور وہاب ریاض کی جگہ امام الحق، خوشدل شاہ، محمد حسنین اور محمد موسیٰ کو شامل کیا گیا ہے۔

ٹاس کے موقع پر ٹی ٹوئنٹی ٹیم کے کپتان بابر اعظم نے کہا کہ اگر ہم ٹاس جیتتے تو ہم بھی پہلے باؤلنگ کرتے، ہم نے آج کے میچ میں 2 ڈیبیو کیے ہیں، ہم چاہتے ہیں کہ یہ کھیلے، ان کے پاس اچھا موقع ہے اور یہ وکٹ باؤلنگ کے لیے اچھی ہے’۔

واضح رہے کہ آج کے میچ میں پاکستانی ٹیم میں شامل کیے گئے خوشدل شاہ اور محمد موسیٰ ٹی20 انٹرنیشنل میں اپنا ڈیبیو کررہے ہیں۔

آسٹریلیا میں کھیلی جارہی ان 3 میچز کی سیریز میں آسٹریلوی ٹیم کو 1-0 کی برتری حاصل ہے اور اگر آسٹریلیا آج کا میچ جیت جاتا ہے تو یہ سریز بھی جیت جائے گا۔

خیال رہے کہ 3میچوں کی سیریز کا پہلے ٹی 20 میچ بارش کی نذر ہوگیا تھا اور پاکستانی ٹیم خوش قسمتی سے یقینی شکست سے دوچار ہونے سے بچ گئی تھی۔

تاہم دوسرے ٹی ٹوئنٹی میں آسٹریلوی ٹیم نے پاکستان کی جانب سے دیے گئے 151 رنز کے ہدف کو باآسانی 3 وکٹوں پر مکمل کرلیا تھا۔

یہاں یہ بھی مدنظر رہے کہ اس وقت ٹی20 میں عالمی نمبر ایک ٹیم پاکستان گزشتہ 5 ٹی ٹوئنٹی میں ناکامی سے دوچار ہوئی ہے جبکہ آسٹریلوی ٹیم نے اپنے آخری کے 5 ٹی ٹوئنٹی میچز میں فتح حاصل کی۔

اسکواڈ

پاکستانی کرکٹ ٹیم میں بابر اعظم (کپتان)، امام الحق، حارث سہیل، افتخار احمد، خوشدل شاہ، عماد وسیم، محمد عامر،محمد حسنین، محمد رضوان (وکٹ کیپر)، شاداب خان، اور محمد موسیٰ شامل ہیں۔

آسٹریلوی ٹیم میں ایرون فنچ (کپتان)، ڈیوڈ وارنر، اسٹیون اسمتھ، بین مکڈرمیت، ایشٹون ٹرنر، ایلکس کیری (وکٹ کیپر)، ایشٹون اگار، سین ایبٹ، میچل اسٹارک، کین رچرڈسن، بلے اسٹین لیک شامل ہیں۔