بھارتی حکمراں جماعت بی جے پی کی امیدوار مادھوی لتھا کو مسلم خواتین سے شناخت کروانے کے لیے چہرے سے نقاب ہٹانے کا مطالبہ کرنا مہنگا پڑ گیا، خاتون امیدوار کڑی تنقید کی ذد میں آ گئیں۔
ڈسٹرکٹ الیکشن آفیسر رونالڈ راس نے بھارتی میڈیا ’این ڈی ٹی وی‘ سے گفتگو کرتے ہوئے کہا ہے کہ پولیس مادھوی لتھا کے خلاف ایف آئی آر درج کرے گی کیوں کہ کسی بھی امیدوار کو یہ حق نہیں ہے کہ وہ شناخت کی جانچ پڑتال کے لیے کسی پردہ دار خاتون کا نقاب اٹھوائے۔
انہوں نے مزید کہا کہ امیدوار کو اگر کوئی شک ہو تو امیدوار پولنگ افسر سے ووٹر کی شناخت کی تصدیق کے لیے کہہ سکتا ہے مگر خود کسی کو کوئی حکم نہیں دے سکتا ہے۔
بھارتی میڈیا ’این ڈی ٹی وی‘ کی رپورٹ کے مطابق حیدرآباد سے بی جے پی کی امیدوار کومپیلا مادھوی لتھا کو ایک ویڈیو کے وائرل ہونے کے بعد پولیس کیس کا سامنا کرنا پڑ رہا ہے۔
حیدرآباد میں لوک سبھا حلقہ سے بی جے پی کی امیدوار، مادھوی لتھا نے حلقہ میں ایک پولنگ بوتھ کا دورہ کیا تھا۔
میڈیا رپورٹس کے مطابق وائرل ویڈیو میں خاتون امیدوار کو انتخابات کے روز پولنگ بوتھ پر برقع پوش مسلم خواتین سے اپنے چہرے ظاہر کرنے کے لیے نقاب ہٹانے کو کہا گیا تھا۔
بھارتی میڈیا کے مطابق اس وائرل ویڈیو کے بعد بی جے پی کی امیدوار مادھوی لتھا آج لوک سبھا انتخابات کے چوتھے مرحلے میں سب سے زیادہ زیر بحث امیدواروں میں سے ایک بن گئی ہیں۔
مادھوری لتھا ایک مضبوط امیدوار ہیں اور وہ حیدرآباد سے چار بار ایم پی اور اے آئی ایم آئی ایم کے سربراہ اسد الدین اویسی کے خلاف الیکشن لڑ چکی ہیں۔
دوسری جانب بی جے پی کی امیدوار لتھا نے نیوز ایجنسی ’اے این آئی‘ سے بات کرتے ہوئے کہا ہے کہ امیدوار کو ووٹر شناختی کارڈ چیک کرنے کا حق ہے۔
انہوں نے مزید کہا کہ ’میں ایک امیدوار ہوں، قانون کے مطابق ایک امیدوار کو فیس ماسک کے بغیر شناختی کارڈ چیک کرنے کا حق ہے، میں مرد نہیں، میں ایک عورت ہوں اور بہت عاجزی کے ساتھ میں نے ان مسلم خواتین سے درخواست کی تھی، اگر کوئی مجھے بڑا بنانا چاہتا ہے تو اس کا مطلب ہے کہ وہ مجھ سے خوفزدہ ہیں۔‘
یاد رہے کہ مسلم جماعت اے آئی ایم آئی ایم کے سربراہ اسد الدین اویسی نے ابھی تک اس واقعہ پر کوئی تبصرہ نہیں کیا ہے لیکن وائرل ویڈیو کو اپنے ایکس ٹائم لائن پر شیئر ضرور کیا ہے۔
